الزله اللي من الادنين محموله
اشيلها فوق متني وتحملها
وهرجٍ يحس ابن عمي عيبٍ اقوله
حيث الرفاقه اندور مايجملها
زلت رفيقي اليامن جات مقبوله
اصد لاوجهت لي واتجاهلها
اخلي اللي يطبل تقفي اطبوله
والكلمه الهينه مانيب من هلها
لكن قولو لبعض الناس قولوله
لايبلش الناس بهروجه ويشغلها
كلٍ يقيم حسب عرفه ومحصوله
ننزل اهل المنازل في منازلها
المنطق اللي بليا فود وش هوله
اهل الحبايل توقع في حبايلها
خذيت لي مع زمان المعرفه جوله ومجرب(ن) عاقل العالم وجاهلها
واليا حصل هرجةٍ ماهيب معقوله
اقول للي يسولفها يبدلها
الطيب ماكل واحد شبره يطوله
يصعب على اللي شروطه مايكملها
يسهل على اللي فعوله تشهد لقوله
يمناه بالطيب ماتحصا جمايلها
كم واحدٍ يمتنيه ولاهو بحوله
يبغا المعالي وهقواته محولها
يمناه ماهي بفعل الجود مبذوله
هقوات نفسه ضعيفه في تأملها
والرجل لاحب نفسه شانت دلوله
طبايعه لازمٍ فكره يروحلها
والعاقل اللي يعرف الوقت وحلوله
يعامل الناس ويقيم تعاملها