الله من عين طرقها صواديـــف = عميت ويبسن بالعروق الصخافــــي
شفت الوزا بالعين من عرض ماشيف=شفته وغيري من فطن له وشافي
وقت تغير فيه حتى العواصيف=جا في عواصيف الرياح أختلافــــــي
شره قناطير وخيره مقاطيف= يفطن له اللي يرضع الديد غافــــــــي
كم واحد جاله زمانه على الكيف=واغترته نفسه يبا الجود وافــــــــــي
يطلع مطاليع العلا بالسواليف=بين العذارى عد روحه سنافـــــــــي
يفرح بهرج بالقفى يكره الضيف=قتات والقتات بالنار هافـــــــــــــــــي
يعلق قصيره علقة النار بالليف=عي ولد عي زنوده ضعافـــــــــــــي
ان رخصت الحذوه توفي عن الحيف=وان غليت الحذوه مشى اللاش حافي
يرقد ويلحق والدينه تخاليف=دايم ومرقد ميت النار دافــــــــــــــــي
هو مادرى ان الجود يبغى تكاليف=سهر الليالي مقبلات مقافــــــــــــــــي
يبغى يدين للعطايا مغاريف=ويبغى رجول ماتمل الوقافــــــــــــــي
والصبر بنحور السنين الشواحيف=اللي قساها مثل حد الرهافـــــــــــي
مايقدرون الجود سود الأطاريف=مشاركة بيض النسا باللحافــــــــــي
يقدر عليه اللي حكم نجد بالسيف=واودع مباغيض القبايل ولافـــــــي
عبد العزيز اللي يبث المصاريف=يجدع قناطير الذهب بالفيافـــــــــي
يمشي على دربه جموع مراديف=نو تحدر ماه والجو صافــــــــــــــي
يشدي لواقيط الزبيدي بعد ريف=ومما كسى البيدا تفيد الضعافــــي