[نجم شامي]

هذه القصيدة موجهها الشاعرالكبير عبدالله بن نايف بن عون إلى الشاعرالكبيرمرشد بن سعد البذال الرشيدي

هات القلم يا مال زينات الأوفاق=يا صاح ونسني ترى خاطري ضيق
خل القـلم من بين اصابعـك دفاق=يرعف على صفحات بيض ٍ لواهيق
يرسم عليهن ما تحالا للا ذواق=طرايف ٍ تشرح صدور ٍ مغاليق
تصريف هجس ٍ ما تسلف ولا باق=لو القوافي قد رموها التفافيق
حطوا لهم قبلي على الطرق طوراق=والسبك غير السبك صوره وتطبيق
لا سالبً معنى ولانيب سراق=ولا خير في قول ٍ يجي فيه تبريق
اقبل طلوع الفجر وانباج الأشراق=وانا اتقلب ماتريح ولا ليق
بلشان مع قلب ٍ مغربل ومشتاق=ادخل على الله من ترد التوافيق
قلب ٍ هواجيسه وهمه له ارفاق=لحقا ً عليه مغربلات العشاشيق
يطرق عليه من الهواجيس طـراق=ويزرق عليه من الروابع زواريق
من واهج ٍ يدهجني الصدرابه ضاق=امسي بضيق ويصبح الصبح في ضيق
كـني بيوم التفت الساق بالساق=شاخص بصيره في حساب ٍ وتدقيق
مالي على الفايت ليا فات ملحاق=فات الفوات وقربت يبست الريق
عليك ياللي حـط بالقـلب دقاق=اونس رجيفه مرقـل بالمعاليق
سمح المحيا شيخ زينات الاخلاق=اللي عليه اعلام قلبي مدانيق
مجمول ٍ اجمل ماتجمل ومالاق=ورد ٍ تغريف ماعـبث به ولاذيق
للبيض من دونه فلا ني بعشاق=من غير ذم ٍ في رقاب الغرانيق
خل ٍ غلاه بداخل الجوف لصاق=ومخرق ٍ رمانة القلب تخريق
ليا اعترض طاريه للذهـن مراق=تجاوبن جناحـن قـلبي بتصفيق
خلا ني اخلج مثل ما تخلج الناق=اللي ولدها ضيعوه الملاحيق
عليه اجاوب لايع الورق بلعاق=واهرف هريف الذيب نصوه وتطريق
يسوقـني من ضيقة البال سواق=لاطول حجا ً حولي على متنه اويق
اويق في متن الحجا ضيق وشياق=اخذ براس الرجم غـفله وترويق
رجم ٍ براسه لأشهب اللون مشراق=وللريح في شامخ ركونه تصافيق
حبيس راس الرجم لين ان الاشفاق=يسوقهن داجي ضلام الحناديق
كنه يوسع خاطري عـقب الاغلاق=يوم اعـتـلى في متن بعـض الشواهيق
من عبرةً ٍ في داخل الحلق بخناق=ما غير اذودها على قدر ما طيق
اكتم اشهاق ويظهر الصوت بشهاق=مالي نديم الا زفير التشاهيق
زفير عبراتً مطرهن ليا راق=غرق هميله مقدم الجيب تغـريق
اخذ من الضيقه على قدر الا نفاق=من ما بصندوق النحر عقب مافيق
واصيح للبذال في متن شوهاق=حيثه من اشخاص الرجال المواثيق
كوده يشاكيني على جور الاضياق=اللي هجوسي في بحرها غواريق
يا مرشد اشكي لك غرابيل الاشواق=اللي لحقـني من وراها ملاحيق
مشرقـني الهاجوس يا مرشد اشراق=كني عليه موكل ً بالتحاقيق
يا بوسعد حيثك مجرب وفراق=وتحط بين الكذاب والصدق تفريق
انا نخيتك من عميقات الأعماق=ماهو مجرد مزح والا لماصيق
اشكي عليك من الهوا ولف وافراق=وهمً وياس ٍ طوق القـلب تطويق
لحيت بك لحت طريح ٍ بمطراق=خلوه ربعه طايحا ً عـقب ماعيق
عقب الشجاعة والفخر طاح وانعاق=صارة حياته من عدوه تشافيق
يا بوسعد من غير تلزيم وارهاق=انا شفاوي في نصيحتك ومشيق
ما شوف للشكوى نفوذاً وممراق=الا على عنوان شكوى المطاليق
ولانيب احط بمخرث العـود معلاق=الا عموداً يحتمل للمعاليق
وجهت لك شكواي في بيض الأوراق=شكوا ً بعنوانك توجه بتشريق
اسوقها يمك جريه وتنساق=عليك يامدل بيض الطواريق
واسلم ودم مالاح في المزن براق=وما ناح ورق ٍ فوق دوح ٍ مواريق
وتحية ٍ فيها شذا المسك زعاق=وازكى سلام ٍ بين الأحـباب قد سيق

رد مرشد

يالله ياللي للمخاليق رزاق=يا منبت ٍ بالقاع خضر الزماليق
تعين من قلبه جزوع ٍ ومحراق=وجنه عظيمات الشكاوي تلاحيق
جالي علي زين التماثيل مدناق=من هاجس ٍ له بالضماير تخافيق
توارد ٍ قـلبي هواجيس ٍ اطباق=وخلا غرامي له بالا فكار تحليق
خـل القـلم بـيـن البـناني له ابراق=يقـود عـسرات المثـل بالخـنانيق
خله يسير امداد في زين الارناق=مثايلاً ماحضروها المطافيق
عبدالله النايف لزمني بمسباق=لزمت اسبوق اللي كفخ بالمسابيق
امبارك منه السلامه والاعتاق=كثر علي مع المسير الصواعيق
عرضني الشوحه وقال الضعن ساق=وخلا خفوفي من حفاهن مراهيق
وانا معه لوهو علي قطع الاشناق=قولً صحيح ٍ ما جمعـناه تلفيق
ويامن تولع في طويلات الاعناق=اللي غلاهن شلق الجوف تشليق
اللي بهن طوق الذهب شبك بحلاق=ونظم القماش اللي جنوه الفواليق
يزمي على كبدك من المر شبراق=من واحد ٍ شوفك لزوله تراميق
خشف ٍ ليا ذير وحقق تحقاق=عاف الشعيب اللي بقشعه مداريق
خلا ك تمشي جسم من غير معلاق=شال الجهاز وهيكل الجسم تعويق
وخليت قلبي بين الاضلاع خفاق=بين لي الموضوع من غير توهيق
وشف ماتبي مني وبعني بالأسواق=وامضي على بيعي واناطق تناطيق
لا شك انا ابانصحك مانيـب دراق=نصيحة ٍ فيها عن الياس تعـتيق
ان شفت في حبل الرجا جبر ودقاق=ترى النسب والروض مافيه تفهيق
بالك تخفى عن لزومك بالارواق=الفوت مثل الما ليا نثر ما حيق
شف لك رجال ٍ لك صحيحين واصداق=ربعـك ليا من الضعـن للضعـن شيق
كل ارجح ٍ وان قام بالجاه زهاق=حضورهم فك القفول المغاليق
واخذ الحبيب ولح معاديك بطراق=وخله يدور في المراح الخماليق
هـذا ان كان انك جـزوع ٍ وحـماق=والا انت تسجيلك على الحب تعليق
راحت علوم الحـب دراس واعـتاق=تنسف عليهن ذاريات الصعافيق
لا تعـتبر في واحــد ٍ بالجـهل ماق=ترا هوى هالوقـت شبهه وتلزيق
احرص على الهاتف لياوحيت طقاق=وسمع مناجات العقول المدافيق
تقـول هـذا شـارب ٍ كـاس تـرياق=صوته يخابق بالخلاعة تخـابيق
من جرب الماضي وحقق بالارماق=شقق دفاترحب هالوقت تشقيق
طرد الهوى للي على الموت دلاق=ناطح رماح ٍ في غلبها زرانيق
اللي مضاريبه بها الدم دفاق=لياجن بالفرسان مثل الزواريق
هذاك اله فكرالعماهيج تواق=مثل الفتاة اللي تكلم عن الهيق
والا لمن لاقاد نشره بالارفاق=مثل العطاوي في هاذيك الدواريق
شليويح لامنه خسق كل نساق=تلقاه عند قطيهن له تصاعـيق
والا لمن ناره كما الصبح شعاق=كبش ٍ على المنسف ورسلان وابريق
والا لمن خيط وسيعات الاشقاق=وعن حق ربعه خفق العوه تخفيق
من دون حق الربع للشره صفاق=ليا استوى بحضورهم حق وحقيق
وباق الرجال ابهم شريفين وخساق=الله جعل من بين الازلام تفريق
وانايالولاالوقت ضايق تضاياق=بادرتكم بزيارتي يالمشافيق
نصيتكم من فوق زين التعشاق=فوق البقوس مريحات السواويق
واختامها بالشكريالربع الاشقاق=وتحية ٍ فيها من المسك تنشيق