[محمد الحميدي]

كريم يـا بـرق ٍ تناقلتـه مـزون
يفضح دجا الظلما و يبحـث خفاهـا
تعلقت في نوظـه عيـون وعيـون
ترجي عسى الله مايخيـب رجاهـا
حول السنه تدرج مزونه على الهون
لين الجزيره رحبـت بـه سماهـا
يوم استقل بقـدره مكـون الكـون
سحايبه ساقت علـى الأرض ماهـا
نبته ومرباعـه موكـد و مضمـون
على الديـار اللـي عـذي ثراهـا
على نفود السـر ياللـي تخيلـون
لا هو بـدون الحـروه ولا وراهـا
يا ربعنا اللـي ل المـارا تحبـون
خلو سهاف الشـل تطلـق يداهـا
بعد مقيظ وراحه ورفـق وسكـون
طوي الفجوج الجرد غايـة مناهـا
فرصة عمر يا ربعنا وش تحـرون
للـي تهيـا لـه ويقـدر عـلاهـا
امـا بوضـح ٍ كنهـا در مكنـون
مع زيـن رونقهـا كثيـر ٍ حلاهـا
عن غيرها تفخر بميـزات وفنـون
واول فخر يوم البيـاض يغشاهـا
والا بشعل ٍ تاخذ امن الذهـب لـون
جواهر ٍ بالنـور يوضـي سناهـا
لا جا نهار مداحم اضعون بضعـون
ياقـل ذيـدان ٍ بتلـحـق مـداهـا
والا بصفر ٍ ل الطرب كونها كـون
مع طولة الشـده طـوال ٍ خطاهـا
فيها ولع مدهوش وشعاف مجنـون
خصـن ليـا مـن المـوده شعاهـا
والا بسود ٍ معهن الزيـن مقـرون
فيهن كحل عين الحسـود وعماهـا
بالقيمـه اتلاهـا مثاميـن مليـون
وجرومها تفرق عن اللـي سواهـا
البل لكل الخلق عون ٍ مـن العـون
وجاهـل مكانتهـا لعلـه فـداهـا
تعتق رقاب ٍ خضر وتخلـق ديـون
اتــلاد والا غالـيـن مشتـراهـا
من حق تجـار البضايـع يمـارون
ومن حقنـا نفخـر بهـا وانتباهـا
امانتن معنا على الحفـظ والصـون
من مبتـدا الهجـره ليـا منتهاهـا
تحكم مزاينهـا ضوابـط وقانـون
ومزايـن عتيبـه رفـع مستواهـا
ربع ٍ حموها يوم طاعن ومطعـون
فعل السيوف اللي رهيـف ٍ شباهـا
قبيلة ٍ ما تقبـل الضيـم والهـون
وتموت ما ترضا بشقـرت عصاهـا
لاباح صياح الضحـا كـل مكنـون
ركبو على اللي مطبقـات ٍ احذاهـا
بارواحهـم دون الغوالـي يفـادون
سحي البكار اللـي مقيـم ٍ غلاهـا
جنابها من من يمة الخوف مامـون
لأن الوسوم امن الخصوم اتحماهـا
واليوم مات الشر وابليس ملعـون
في دولة ٍ عـم المواطـن رخاهـا
عاشو هل العوجا لنا درع وحصون
بالعـون حكـام ٍ يـذري ذراهــا
وباسم الوطن عزوة عتيبه يهلـون
افرادهـا وشيوخهـا واومـراهـا

صح لسان ابوسعد ولاهنت ياعمر وبارك الله فيك

التوقيع