[راعي البرصا]

بسـم الله الرحـمـن الـرحيــم

انا سبق وكتبت الموضوع والظاهر انه حذف بالخطأ ما ابغا اظلم الاداره

واذا قصدهم انه مكرر انا حبيت اعيد كتابته بعنوان جميل ومرتب

لأن صاحب الموضوع الاساسي وله مني التحيه والتقدير يوجد بعنوان

الموضوع اخطاء طباعيـّه واستميحه عذراً ان اعيد صياغته :

من سلسلة الدعم المتواصل من قبل ابناء القبيله لـ المتلقـى الثقافي

لـ قبيـلـة عـتـيـبـه فـي مزايـيـن الإبـل

تـقـدم

الـشـيـخ / مـحـمـد بـن صـالـح الـدعـجـانـي

بدعـم خزينـة الملتقى بـ مليـون ريـال سعـودي ونحن هنا بدورنا

نشكر ابو صالح على هذا الدعم السخي وهذا ليس بغريب على

ابناء قبيلة عتيبه .

وبالمناسبه انا سجلت شيـلة الشاعر الفحل / سفر الدغيلبي

في مزاين عتيبه .. ولكن ما اعرف كيف انزلها على الموقع

على العموم حاولت اكتبها لكم كامله على شان تسمتعون في

هذا الابداع من الشاعر المخضرم والفحل سفر الدغيلبي والصراحه القصيده

قمه في الابداع والتميّز والجزاله والمعاني القويه .. وسوف اتركم مع القصيده

وهي تحكي نفسها

كريم يابرقٍ تناقلته مزون= يفضح دجا الظلما ويبحث خفاها
تعلقت في نوظه عيون وعيون=ترجي عسا الله مايخيّب رجاها
حول السنه تدرج مزونه على الهون=لين الجزيره رحبت به سماها
يوم استقل بقدرة امكون الكون=سحايبه ساقت على الارض ماها
نبته ومرباعه اموكد ومضمون=على الديار اللي عّذي ثراها
على نفود السر ياللي تخيلون=لا هو بـ دون الحروه ولا وراها
ياربعنا اللي لـ المارا تحبون=خلو سهاف الشل تطلق يداها
بعد مقيظ وراحه ورفق وسكون=طوي الفجوج الجرد غاية مناها
فرصة عمر ياربعنا وش تحرون=للي تهيّا له ويقدر علاها
اما بوضحٍ كنها در مكنون=مع زين رونقها كثيرن حلاها
عن غيرها تفخر بـ ميزات وفنون=واول فخر يوم البياض يغشاها
والا بشعلٍ تاخذ امن الذهب لون=جواهرٍٍ بالنور يوضي سناها
لاجا نهار امداحم اضعون بضعون=ياقل ذيدانٍ بـ تلحق مداها
والا بصفرٍ لـ الطرب كونها كون=مع طولة الشده طوالٍ خطاها
فيها ولع مدهوش وشعاف مجنون=خصن ليا من المودّه شعاها
والا بسودٍ معهن الزين مقرون=فيهن كحل عين الحسود وعماها
بالقيمه اتلاها مثامين مليون=وجرومها تفرق عن اللي سواها
البل لكل الخلق عونٍ من العون=وجاهل مكانتها لعلّه فداها
تعتق رقابٍ خضر وتخلص ديون=اتلاد والا غالين مشتراها
من حق تجار البضايع يمارون=ومن حقنا نفخر بها وانتباها
امانتن معنا على الحفظ والصون=من مبتدا الهجره ليا منتهاها
تحكم مزاينها ظوابط وقانون=ومزاين عـتيـبة رفع مستواها
ربعٍ حموها يوم طاعن ومطعون=فعل السيوف اللي رهيف ٍ شباها
قبيلةٍ ماتقبل الضيم والهون=وتموت ماترضا بـ شقرت عصاها
لاباح صياح الضحا كل مكنون=ركبو على اللي مطبقاتٍ احذاها
بارواحهم دون الغوالي يفادون=سحي البكار اللي مقيم ٍ غلاها
جنابها من يمة الخوف مامون=لأن الوسوم امن الخصوم اتحماها
واليوم مات الشر وابليس ملعون=في دولةٍ عم المواطن رخاها
عاشو هل العوجا لنا درع وحصون=بالعون حكامٍ يذري ذراها
وباسم الوطن عزوة عـتيـبـة يهلون=افرادها وشيوخها وومراها

وسلامتكم .. لـ الشاعر الفذ والراقي والمخضرم / سفر الـدغـيلـبـي


والسلام ختـام

أخوكم / راعي البرصا الـدعـجـانـي

آخر تعديل راعي البرصا يوم 21-Sep-2007 في 02:14 AM.