الهيـــــــــــــلا *** منتدى قبيلة عتيبة - عرض مشاركة واحدة - تغطية الهيلا لحفل تخرج ابناء قبيلة عتيبة من كلية الملك فهد الأمنيه 1432هــ

اللجنة الإعلامية · 13-Jun-2011, 01:57 AM

الشاعر الخريج/مشعل نايف السميري

يالله جملني على حق تكفى

لا جا اللزوم احد من حد شلفا

في بكرةٍ ما هي على الحول خلفا

لا فطرن مع دور الايام الابكار

.

و يالله بعونك في عريض المنصه

عن هرج لا يشرى و لا يباع نصه

لا يتبع اللقمه و لا يفك غصه

قدم الحضور اللي شخصوبي بالانظار

.

في مرحبا لضيوفنا اللي لفونا

على النقا و الطيب هم شرفونا

و لاحنا بمعفيين لو هم عفونا

من الكرامه و الكرامه لنا كار

.

يا مرحبا يا ضيوف باسم المعازيب

و نيابةً عنهم بارد التراحيب

يا مرحبا في حلةٍ كلها طيب

و يرهي معزبها على الضيف الاعذار

.

ما هو قصور الا طموحٍ على الزود

نقا يدينٍ تتقي كل منقود

تصفع مشاريهٍ توارد كما الطود

صفعة صباحٍ ينحر الليل بانوار

.

يا مرحبا طيبٍ من الطيب مجناه

و يا مرحبا عزٍ على العز ماطاه

و يا مرحبا شيبٍ على لحية الجاه

يا مرحبا عدة عدد زخ الامطار

.

يا مرحبا نجمٍ علا نجمة سهيل

دليل من يضرم على البن و الهيل

دنة نجر و لاَّ شعاع القناديل

دليل هتاش القرى وقت الاسحار

.

يا مرحبا مرسومةٍ بين عينين

من نطقها لاسماعكم ضافية زين

و نضفي لها الفرحة بطلق الحجاجين

ما هي بعقد حجاج بوجيه خطار

.

مقام من طاوله طاب له عز

من فعل كفَّه فيه لا بد يبرز

أما له الصعبات بالحال تعنز

و لاَّ يعدونه و يعتاد ما صار

.

في قاعة الأسطورة اللي جمعتنا

العام و اللي ورى العام و سنتنا

قدامنا دفعة و دفعة قفتنا

توالي الأجيال من ماكر أحرار

.

الكل منهم ذاخر الطيب لأبوه

يجلب عليه النعم عن كل مشروه

يخشى تلقاه المكيدات و يتوه

يصبر على غبن الميادين ماحتار

.

صفوة طويلين اليماني المطاليق

عوق الصديع اللي جعلوله مسابيق

شبوط ما يوقع بروس الشواهيق

مغير في كبد الدجى طعمته فار

.

يا ضيوف فازوا بالمواقيف فازوا

اصحابي اللي للشهادات حازوا

هنيهم بالطيب للشيب جازوا

واهني من جازا على الطيب ما بار

.

يا ضيوف هذا حفلهم يوم قاموا

و عن الرخا و الهون للصعب شاموا

وردوا على سوق الصعيبة و ساموا

دون الوطن و الدين ساموا بالاعمار

.

حنا سعوديين يا صوت الارهاب

و ابناء سعوديين يا عصعص الداب

يا عملة التدمير ما ارهبت الاعراب

زنود و عضودٍ كما الطوق للدار

.

نحمي الحما و نصون عهدٍ قطعناه

إنّا ليا صكوا حواليه شلناه

دارٍ من اعمار العزايم عمرناه

ما نسمح بهده لو الجار به جار

.

هذا و للجزلات تفسح منابر

و يرخي لها الاسماع من كان كابر

تاخذ به الافكار عن كل ثابر

يونس حلاوتها على لسان الامرار

.

خطة قلم من فكر صافي و وافي

على الورق تنخط و الحبر صافي

فيها من المرحب على كل لافي

امداد من فكري ليا شردت افكار

.

اصبها بالصوت باسماع ربعي

عتيبة الهيلا زنودي و ضلعي

لا شانت الهيَّات ثم شان طبعي

إبها على الهقوات مزداد باشبار

ــــــــــــــــــــــــــــــــــــــــــــــــــ ـــــــــــــــــــــــ

قصيدة الشاعر سعدي الكسر