السلام عليكم ورحمة الله وبركاته
هذه القصيدة للشاعر الكبير غازي بن دخيل الله بن عون
يامل عيـن ماتهملـج علـى النـوم=ليا طرى بالقلب بعـض الطـواري
لناموا اللي مونسوا حـزن وهمـوم=غدى بسوق القلـب بايـع وشـاري
وليا طرالي فايـت فـات واعلـوم=اليوم راحت مثل وصـف الهـذاري
مالوم قلبي لـو يهوجـس ولا لـوم=عيني ولو جـادت بكثـر العبـاري
تطريلي أوطان بها أمثال وارجـوم=مدهال سلفان ربـوا فيـه ضـاري
دار سلفنـا حرروهـا مـن القـوم=عنها الضديـد مشددينـه إجبـاري
دار خذوها قبـل حاكـم ومحكـوم=ماجت بسلـم المشتـرى والعـواري
ولا جت بحبة روس واجباه واخشوم=جتهم عقب ضرب النمش والشباري
كم سيرت فيها مـن اقـدام شغمـوم=وكم تيهوا فيها عـراض السمـاري
أهل جهـام لانتشـر كنـه غيـوم=هجنٍ هميمـات وعبيـد وجـواري
وأهـل مهـار ماتبـي زود تعلـوم=معلـمـه ومولـمـه للـطـواري
وأهل بيوت تحتضن كـل مضيـوم=وساع الربـاع منقشـات المـذاري
ليـا زبنهـا خايـف صايبـه لـوم=يامـن بضـل مشيـدات القـواري
يفرح بها اللي بات مـاذاق مطعـوم=من الجوع والخرمه بوجهه مـواري
يبشر برسلان على ليفهـا كضـوم=ونجر يجاوب جايعـات الضـواري
وصفر نثيلـة نارهـا كنهـا كـوم=يديرها قرم علـى السهـر ضـاري
ويوم الزمان اللي على الناس مشئوم=وقتٍ جعل بعض الحمايـل وقـاري
وهم يذبحون الحيل والفطـر الكـوم=للضيف وللرمل النسـاء والـذراري
وقصيرهم دايـم مكـرم ومحشـوم=مـن حشمتـه كـل لحقـه يـداري
وان سنعوا دار مـن القـدم ماسـوم=ماداج فيهـا الا الضبـا والحبـاري
زاروه لو دونه مفـازات وحـزوم=بشقح البكار اللي تبوج الصحـاري
ولخذوا لهم وقـتٍ مقـدر ومقسـوم=وحف النبات وجت ليال الحـراري
ثم قيل قهموز الشفا صابـه افعـوم=منه الشعيب وكل مشبـوك جـاري
شالوا على شقح تهوم الوطـا هـوم=تمشي النهار وتشمطـه بالمسـاري
يبون من وادي الدعيكـه لام الـدوم=وماطمنة سفـوه وهـاك المحـاري
ولا شيف نبت الصيف فتكله اكمـوم=وقفى السحاب وجف نقع الخبـاري
وردوا ركايا طلحهـا كنهـا الـدوم=لفقورها في الضلع الاشهب مجـاري
عدٍ رهيٍ مـاه لـو كـان مزحـوم=ماتنقصه فالقيـض سـود المقـاري
واخذوا ثلاث شهور والشمل ملمـوم=ولا للشديـد وللمحاويـل طــاري
ولقالوا الصفري له ايـام مصـروم=واقفى المقيض وجت ليال الصفاري
راحوا من المقطان شتـان واقسـوم=كـل بمضهـوره لشولـه يبـاري
يبون ريـفٍ فـي مناديـه كيهـوم=لربد الحباري والضبا فيـه اثـاري
وعابين لاجوال الحما كل صـاروم=طوال العواتق بـارزات الـزواري
كل أفدعٍ تقـول بعضامـه اعثـوم=من الريش جسمه مثل ماقيل عـاري
واصابعه حرشٍ على جـل الابهـوم=وصوايده تشـدي حـداد المبـاري
لا روحوا به لانتهت حـزة الحـوم=واثرهـن بالخـد آخذاتـه حـواري
بارضٍ خـلا ومرثـعٍ فيـه بقـدوم=وهـن فالكـاك يلقطـن الغـراري
ثم طلعوه العصر في راس مرجـوم=ثم بان في وجهـه لطلعـه شـواري
ثم فاع مثل اللي من النـوم منهـوم=وليا الحباري وقم نـوز السـواري
لادلى من اللجه على الخرب ملـزوم=من صايده يفـرى ثناديـه فـاري
وان كان عند الخرب هقوات وعزوم=ثم قام يجذف مثل جـذف الهـواري
لحقه بالملحاق لـه طبـع واسلـوم=اللي بطيب الجري مالـه امجـاري
اما عثـره بصايـدٍ منـه مسمـوم=ولا ينزلـه نـزول اضـطـراري
وهاك العشي من فعله الجول مثلـوم=مثل الشجاع اللـي لربعـه يثـاري
عبرت عـن شـيٍ موكـد ومفهـوم=نباه شـاع مـع العلـو والحـداري
واليوم راحت كنها اضغاث واحلـوم=بلاقـعٍ منهـم فجـوج الصحـاري
حتى المنازل مالها اطلال وارسـوم=بنت عليها عقـب اهلهـا الـذواري
يوم اذكر اهلها امس واشوفها اليـوم=ينزف صوابي عقب ماكـن بـاري
وينهار عزمي وانفجع وازري اقـوم=وادري ان ماجاهم على الروح جاري
مابـه حيـاة دايمـه دايـم الـدوم=لابد منهـا مرتحـل مثـل غـاري
كلٍ عليه تـراب الاجـداد مـردوم=في شبتـه ولا ليـا صـار هـاري
لو عالجوا من صابه القـدر بسهـوم=وجابوا الطبيب الماهر الاستشـاري
ماله عن اللي لـه مقـدر و مقسـوم=لو هو بصرح له حصون وسـواري
مار انصح اللي فالمتاهـات منجـوم=ليا متـى وانتـه بغـدراك سـاري
وشلون تعصى واحـدٍ حـي قيـوم=وانته عن الموت وعن النـار داري
اذكر نهـار فيـه مبعـد ومرحـوم=وتجزا بما سويـت شـرٍ و خـاري
فمن صار عن ديد الملذات مفطـوم=ولا باع في سوق المرابى التجـاري
لا جا اختبار فيه ماهـوب مضلـوم=احدٍ رسب واجـدٍ بفـوزه يمـاري
يُعطى لـه كتـابٍ بيمنـاه مرقـوم=وذولاك عطيوا كتبهـم باليسـاري
وليا اصبحوا قسمين معطى ومحروم=به قسـم جنانـي و قسـم نيـاري
فازوا هل الجنـه بكـادي ويشمـوم=وبقاصرات الطرف هيم الخصـاري
وشربوا رحيقٍ من شذا المسك مختوم=وعليـه دانيـةٍ قطـوف الثمـاري
واهل جهنم فـي ضريـع وزقـوم=تجرعوا كـاس النـدم والحسـاري
يعذبون الـى اجلـس غيـر معلـوم= يعلم بـه ربٍ صمـد فـرد بـاري
يالعبد وقتك كلـه اخـداع ووهـوم =لا تنخدع به واخـذ منـه الحـذاري
بزكاة مالك والصلوات والصوم=وتطبيق ماجاء في صحيح االبخاري
واسلك طريق اللي عن الميل معصوم =اللي سنـا هديـه ينيـر الغـداري
كودك تفوز برفقـة ابـن أم مكتـوم =وأو عبيـده وابـو ذر الغـفـاري
ابديت قيل فـي الصناديـق مكتـوم =ولاهمنـي منقـود نـاقـد وزاري
منتوج فكـرٍ للعواريـف منضـوم= عساه ينفـع كـل سامـع وقـاري
وصلوا على اللي للشفاعات زيـزوم= ماهجرساً فوق الغصـون القمـاري
«®°·.¸.•°°·.¸¸.•°°·.¸.•°®»وتقبلوا تحياتي وطالبين العذر كان فيه أخطاء«®°·.¸.•°°·.¸¸.•°°·.¸.•°®»