[امير الصفوى]

(قصيدة مهداة)=
قال الذي بالنايفات اتسلق = شماً طوالاً ماعليها مخلق
اللي* بعاليها الذياب تعاوى = والطير حايم والهبايب تصفق
والرعد يرعد والسحايب تمطر= والبرق في قدم السحايب يبرق
شما بعاليها جلست* اغني = شرد بيوتاً.حاليات المنطق
ندر بيوتاً من بنات افكاري = اللي عليها إمن الجزالة رونق
اقول فيها بعد هذا المطلع =قدام يفتح كل باباً مغلق
سلاماً ازكى من عبير البيشم = اوعوداً ازرق في المباخر يحرق
واغلى من الياقوت ومن اللولو= في عنق منهي تلبس الاستبرق
واصفى من الماي الفرات البارد = اللي على صم الصفا يترقرق
يلفي على حظرة جناب الوافي = طلق الحجاج.النادر آبو مطلق
شيخاً لياعدو رجال الفزعة= عدوه الاول والكلام اموثق
بنك العطايا والهبات الجزلة= ومحيط جود وباذلاً متصدق
ومكرم الاضياف لا من جو له = وفي العلوم الغانمة مايسبق
ربعه هل الطولات واهل النخوة= داعي العصيمي حاملين البندق
اهل الملاحم مدبين الباغي =كم روح خصماً من قناهم تزهق
والقول هذا مثبتاً ومتورخ = يكتب وينقش بالمداد الازرق
ووصولكم ترجع لدعوى عتيبة = عتيبة الهيلا حماة البيرق
أهل النسب وأهل الحسب والمذهب= اللابة اللي للمراجل تعشق
هذي مشاعر شاعرٍ من قلبه = شاعر ليا من قال قولا ً يصدق
اعرف رجاجيل كرماء وافاضل= لكن شخصك يالمكرم يفرق
شفت السماحة والوقارأبشخصك=وايديك بجزال العطايا تنفق
عوناً لمن يشكي عثاير وقته=اللي من خطوب الحوادث مرهق
واليا تنصاك الخوي في حاجة =قلت ابشر ابشر واطمئن لا تقلق
دارك لعصمان الشوارب ملفى= ضيافة ماهي ضيافة فندق
ادلال بناً للضيوف تقدم =وخلاص يسبقها وسمناً يهرق
ومفطحاتٍ في صحوناً تلمع= شي منها يندا وشياً يسلق
والعود الازرق في ركون المجلس= يعج مابين الضيوف ويشعق
وسوالفاً فيها بيان وحكمة =تصغي لها الاسماع يوماً تنطق
وتدوم يابحر الندا والطيبة=ماغمضت عيناً وقلباً يخفق
اسال مولاي* العلي الواحد =ذو الكبرياء ذو القوة اللي يرزق
إنه يبومطلق يطول عمرك=ياصاحب الوجه البشوش المشرق
والله يزيدك من خزاين فضله = وإنه عليك إمن العطايا يغدق
واقبل تحياتي وعاطر قولي = ماغرد البلبل ورفرف بيرق
جندب المالكي=