يافهد من غربتك بالصدر حاضي
من سنين(ن) مركمه عيت تبيدي
لاذكرت اعدادها يابوك جاضي
قلبي اللي عن غلاكم مايحيدي
فيه هم وقل نوم وفيه لاضي
مايفيد الصبر فيني مايفيدي
كني اللي ماشين وسط الرماضي
في لهيب القيض والمزهب زهيدي
السراب يشاهده وسط الفياضي
والضما حاديه والمورد بعيدي
مع سباريتً غواهيب(ن)عراضي
مخطراً بالموت ماعنده عضيدي
يعتريه احيان مع همه شواضي
باح سده في فنا البيداء وحيدي
الضواري حافته فيها اجتلاضي
والسلاح ضعيف من عود الجريدي
المنايا قربت والقلب جاضي
يطلب الخلاق رزاق العبيدي
هل دمعه من عنا وقته وفاضي
مايسر الجاه مع كثر الرصيدي
5
عيد بجاد بن شده