[قريش البطاح]

أنعم وأكرم بهذه القبيلة العريقة
التي لها تاريخ و بطولات مشرّفة
ولكن ألا ترى أخي منصور بن فهيد
أن العنوان قد يظلم بعض العوائل
أو القبائل غير الهوازنية ضمن المنتفق؟
من أمثال شيوخ المنتفق السعدون الهاشمية
وهذه مجرد ملاحظة و بحثت عن هذه القبيلة
كثيرا ً أي المنتفق و لم أرى في أي بحث
لها معنون بـ " قبيلة المنتفق الهوازنية"
بل كل البحوث التي رأيتها كانت"عشائر
المنتفق " ..الخ و أنعم و أكرم بهوازن الكريمة
هذا والاختلاف في الرأي لا يفسد للودّ قضية

وأضيف القصيدة التالية الرائعة في آل سعدون تعتبر من أعذب ما قيل في الشعر النبطي في التباكي على أمجاد الماضي كُتبت أثناء ثورة بعض العشائر على الشيخ سعدون باشا، ويذكر العوني فيها الشيخ عبدالله بك بن فالح باشا السعدون طالباً منه التكاتف مع خاله سعدون باشا , ويطالب جميع أفرع السعدون للتكاتف ضد أعداءهم.... وهذا نصها:

يا ركـب حلّـوا باليـرازوم زورهـا=تلّـوا معاذرهـا تـعـدّل نحـورهـا
أودع لبيـب القلـب منكـم وصـيّـة=تحيـر بلسانـي، وقلبـي يفـورهـا
عسى يا هل السمحات تقدون بالهـدى=والعافية فيمـا نبـا مـن عسورهـا
ولا تقصر الراضة لكـم راس مقصـد=ما دام سوج اكوارهـا فـي وكورهـا
يعابيـب فـي قطـع الخـروم دوارب=تمـارى بتفهيـق الفيافـي صدورهـا
على مثلها يا ركـب تـدّي رسالتـي=إلى مربع الرملـه وموفـي نذورهـا
أخا الجود، ربّ المجد والجاه والنـدى=ولد فالح المسمّـى بصكّـة دهورهـا
بـدّوه مـنّـي يالحشـامـا تحـيّـة=عسى حرقةٍ بالقلـب يبـرد حرورهـا
قولـوا يخصّـك بالـسـلام مـولّـع=في حـبّ علياكـم ورفعـة نشورهـا
رفيقٍ مصافيكم يبـي جمـع شملكـم=عسى ترثة الجـدّان تبعـث قبورهـا
عسـى مكانـاتٍ بنتـهـا جـدودكـم=يعمـر بناهـا مـا تهـدّم قصورهـا
وعن لا يضيع امـر الحميّـات بينكـم=وانتـم هـل الدنيـا وعـزّة ذكورهـا
وانتم هل القدمات في سالـفٍ مضـى=نجوم الرواسي مـا تخفّـى بدورهـا
تنهـاب سطوتكـم، ويرجـى نوالكـم=عدوّكـم دايـم يحسّـب خطـورهـا
واليوم ضعتوا بيـن الاوبـاش كنّكـم=قطين بـدوٍ ساكـنٍ مـع حضورهـا
مـا عـاد يرجيكـم صديـقٍ لكربـة=ولا عـاد يخشاكـم عـدوٍّ حذورهـا
وانا اشوف عدّتكم كثيرة، ومـا لكـم=علـى أيّ ذنـبٍ يعتريكـم فتـورهـا
سبب ملككم يوكل جميعـه، ولا لكـم=سديس خمسٍ يجتبى مـن عشورهـا
غـدا بيـن خـدّامٍ وفلـحٍ نهـايـب=أراذلٍ بـيّـن عليـكـم فـجـورهـا
إلى صار خصمٍ بينهـم عنـد قسمهـا=يستشهدون شيوخكم عـن حكورهـا
مواريـث شيخـانٍ خذتهـا جدودكـم=لكـم عقّبوهـا ورّثوهـا بـزورهـا
وغيره خـذوا كـلّ العراقيـن عنـوة=بشيـبٍ وشبّـانٍ دماهـا عطـورهـا
مـا حاولـوا ملـكٍ بهـون وتمـدّنو=تعلّـم اللغـوات تسمـج هـذورهـا
سوى الضرب بالهندي، وصكّ عظايـم=وصبرٍ على عسر الليالـي وجورهـا
الأيـام وش لذّاتهـا كـان مـا بهـا=حلوٍ تذوقه عقـب جرعـة مرورهـا؟
ولولا الشرف والسيف والفضل والندى=كان اتّست كرعانهـا مـع ظهورهـا
تمنّيت لـو شيـخٍ مـن اولاد مانـع=ستر العذارى فـي مواقـف أمورهـا
وتمنّيت لـو يحضـر حمـودٍ وناصـر=وعجيل اخو سعدى مصالي شرورهـا
أبيهم يحضـرون، ويشوفـون حالكـم=وانا اشوف واشهد عندكم من حضورها
تقولون قـلٍّ صابنـا عقـب خبركـم=واشوفكم كثـر الدبـا فـي نشورهـا
تقولون صكّتنـا الحرايـب وعاضبـت=دنيـا علينـا أوجهـت فـي دبورهـا
نقول كذبٍ بـل تحربـون مـن بغـى=يشيـل رايتكـم، ويسعـد سفـورهـا
تقولـون دنيانـا عليـنـا تغـيّـرت=تغيّرتوا انتـم مـا عرفنـا غيورهـا
الأيـام هـي الأيـام مـا زاد عدّهـا=سنينهـا هـذي، وهـذي شهـورهـا
لى عـاد اهـل مـالٍ كثيـرٍ وثـروة=واهل فرسةٍ تبرد عن الكبـد زورهـا
لاشـكّ غيّركـم تماليـق مبـغـض=وذلٍّ حشـا لبّاتكـم فـي صـدورهـا
يا حيـف يـا اولاد الشبيبـي معيّـرة=عليكم بتصخيـر الحبـاري صقورهـا
ما تانفـون العـار والـذل والـردى=ونفوسكم طاحـت وضاعـت قدورهـا
ترضون بالجيـران تُسلـب حريمهـم=يا كبرها يا ليـت مـا صـار دورهـا
يا حيـف صيحـة بنتكـم تتركونهـا=قصّت ذوايبهـا، وقطعـت خصورهـا
وين الشبيـب اللـي تعـدّد علومهـم=عنهم جميع الناس تقصـر شبورهـا
وين الـذي يعـزّون لا رحـم حيّكـم=وقابـعٍ تعـرف بماضـي عصورهـا
وين المحمّـد دوحـة المجـد والثنـا=و أخوان وضحا كان ولّـت شرورهـا
واخوان قطمـا، والشبيـب، وخلطهـم=شهب المنايا كـان حامـت نسورهـا
يا حيف يا صلـب المناعيـر خلّفـوا=شروا حـرارٍ وقّعـت فـي وكورهـا
ما منهم اللي طـار يطلـب فريستـه=سوى نـادرٍ خلّـي يصالـي كدورهـا
مرٍّ يهوم الشـرق والغـرب واليمـن=دومٍ يناحـي دونهـا مـن يـدورهـا
بنفسـه، وسيفـه، والعيـال ثـلاثـه=وعظمٍ شظا صم الصّفا من وعورهـا
وهو واحدٍ ماله علـى الضـدّ ناصـر=سوى الله غيره ما ترجّـى نصورهـا
مـا كـنّ لـه حـيٍّ ولا لـه قبيلـه=يوم ان عينـه بـلّ دمعـه حجورهـا
بكى دمعةٍ ما هيب من ضعـف همّـة=لا شكّ من ضيـم الرفاقـه عبورهـا
فزعاتهـم لـومٍ وشـوم وشمـايـت=وسوالـفٍ مـا سولفتهـا بـزورهـا
عليتوا يا اولاد الشبيبـي عـن الهفـا=حيفٍ تصيـر الـدار تهـدم ستورهـا
ما غير ابـو ثامـر يصالـي حريبـه=معشّي الثعالب والحدا مـع نسورهـا
والليث والسرحـان والنمـر والفهـد=تعـاوت عليـه، وجمّعتهـا نفورهـا
إبـن سعـودٍ جـاب نجـدٍ يجـرّهـا=وابن صباح اجمل بشاشـة بحورهـا
وحـاف الظفيـر والبـدور وغيرهـم=ولجّت عليه مـن القبايـل سعورهـا
وصادم لكـلّ اعـداه مـا لان جانبـه=ولا تزعـزع يـوم كثْـرت عثورهـا
إلى ما انقضت شاشاتهم عقـب ذلّهـم=وهو مثـل سنجـارٍ بليّـة نحورهـا
عليكـم يـا اولاد الشبيبـي مـلامـة=إلى ما جليتوا غشّكم عـن صدورهـا
وش خانـة القـبّ الجيـاد وربطهـا=إلى عاد ما زارت حمى من يزورهـا؟
وش خانـة الدنيـا، ولـذات عيشهـا=إلى تركت الغيرة، وتركـت غيورهـا؟
تكفـون شبّـوا ناركـم دون جاركـم=وعجّ السبايا والقهـر هـو بنحورهـا
تكفون يـالسعدون قومـوا جميعكـم=تشوفـون لـذّات المعـزة ونـورهـا
تراكم حصانٍ، والقبايـل كمـا الرمـك=إلى اعطفت فكّـت ولانـت ظهورهـا
شبيبات كبـر الشـق فيكـم واتّسـع=للاقصين والأدنيـن بانـت شبورهـا
شبيبـات أنخاكـم ثمانـيـن نـخـوة=بيومٍ لعـل النفـس تلحـق سرورهـا
فان ما حصل قصدي وضاعت مدايحي=بكم خاب ظنّي ليـن ينفـخ بصورهـا
قلته وانا معكم علـى الليـن والقسـا=صديقٍ شفيقٍ وافـيٍ فـي عسورهـا

الشاعر/محمد بن عبد الله العوني(شاعر الحامسة النجدي ذائع الصيت)