[فرناس]

هالموضوع صارله قصه طريفة

كان معي قحطاني عاطفي علومه كبار والرجال ونعم مافيه نقص الحق يقال وكانت سوالفنا عادية ونتطرق لعتيبة وقحطان بس مانطول

يوم من الايام صار بيني وبينه نقاش وحنا في استراحة والموجودين انا وياه واثنين من اهل الجنوب واحد شهراني وواحد مالكي وسالفه تجر سالفه لين جينا عند طرد عتيبة لقحطان من نجد بخشوم الهنادي ومزارق الشلف وطال الكلام بيني وبينه في هالموضوع

الرجال مار يجحد عيني عينكم ويقول نجد حكمناه وطردنا الدواسر والسبعان والمطران وذبحنا شيخهم وطبان
وانتم يالعتبان كل ماجيتونا هزمناكم وذبحنا شيوخكم ولانزلتو فيه غير امس شريتو مزارع وارضي في عهد الملك عبدالعزيز وسكنتو فيه ولونكم طاردينا كان جو باقي قحطان من الجنوب ورجعو ديرتهم من العتبان

قلت هذا كلامك يالقحطاني تبا تبرر مار الله ماوفقك وهالكلام مهوب قوه لك لاوالله الا استضعاف وضعافة منك

قلت اول شي كل اهل نجد يعرفون ان العتبان طردوكم من ديركم بالغصب مهوب بالرضى
وثاني شي يوم تقول اهل الجنوب لونكم هازمينا جو وش يبا يلقون اهل الجنوب غار السيوف والشلف الي صخرت عيال عمهم قبلهم ويدرون ان جلوسهم في ديرتهم ازيلهم واطول لعمارهم
وغاره يالقحطاني ربعك القحاطين يتحالفون مع المطران والدواسر يعني مهوب لحالهم مهمب ناقصين قلة رياجيل مار كلها تفشل

المهم طال الكلام بيني وبينه وقلت الي بيني وبينك الكتب القديمة الي مهمب عتبان ولاقحاطين قال تبيني اصدق الحضران والله مهيب هي يالعتيبي ناخذ تاريخنا وتاريخكم من الحضران حنا وياكم ابخص بتاريخنا من الحضران


قلت يامال الشحم انت هالحين جاحد شي كل الناس تعرفه وانت والله انك خابر ان جدانك مطرودين بالغصب مار تحسبنك لاقلتها انفضحت

قال الحقيقة ماينزعل منها والحقيقة انا مسيطرين على نجد ولاتقدر تطبه لاعتيبة ولا غيرها مع احترامي للعتبان والقبايل الثانية غير بذن ابن هادي

قلت ابن هادي هو الي زبنكم الحصاة علشان تحتمون من سيوف وشلف عتابة ومن هاك الوقت لين توحدت السعودية والقحطاني لاطب ديرته الي اخذوها عتابة قطعو رجله العتبان واخذو الي معه وان قاومهم قطعو راسه

قال انشد شيبانكم كم شيوخك الي عندنا قلت وانت انشد شيبانك كم شيوخك الي عندنا هذا من غير الارض الي يموتون الناس وهي ماماتت

والكلام والله طويل يبالي صفحات ووقت طويل اكتبه زبدة الكلام

قال فيه حل يرضيني ويرضيك قلت وشهو

قال ان روح ان وياك لوحد من شيوخكم وننشده ثم نروح لواحد من شيوخنا وننشده وهم الحكم بيني وبينك
لان الرجال داري ماحنا بمكبرين السالفة ورايحين ننشد بس وده يموه الموضوع ويخلي ماله حل

قلت انا ماعندي مانع بس ليش نروح لشيخين واحد يكفي قال منهو منه قلت انا عادي لويصير قحطاني مشكلة قال ابشر ابي انسق موعد واحد من شيوخ قحطان وبلغك ونروحله

قلت لا انا اختصر علاك وهالحين مار يالله اركب قال هالحين قلت ايه قال مزح ولا صدق قلت هذولي الرياجيل يشهدون
وان كنت مانيب على كلامي تراك الصادق وانا الي ماعندي سالفة قال توكلنا على الله قلت وانت يالشهراني وياالمالكي نبيكم معنا شاهدين قامو يكنكنون ويبتسمون قالو مالنا دخل تطرد عتيبة من قحطان ولاقحطان تطرد عتيبة انتم الله يسهل علاكم وحنا بنجلس

قلت روحتكم معنا مهمه وتر الدعوى اسهل من الي توقعون قالو والله مالنا دخل وهذي امور راحت والمشكله بينكم

قلت اخذو سيارتكم واذا ماعجبكم الوضع ارجعو والله يسهل علاكم قالو والله لويصير مايصير في هالموضوع ماحنا مخاوينكم من غير قصور فيكم قلت بكيفكم يالله يالقحطاني

وانا منول ابيهم شهود فقط لاغير بس عيو الرياجيل

المهم ركب معي في سيارتي قال انت تمزح قلت هالحين تشوف قال ترانا ليل ومن اصبح افلح قلت موضوعنا نبا نخلصه الليلة قال منهو الشيخ الي تعرفه ونروحله قلت يرضيك ابن لبدة قال اي بالله شيوخ وكفو قال هو قريب قلت مايحتاج صكت الرجال لاوالله ان هاك المقهى وانا وقف عنده قلت يالله حول قال وين قلت حول وتعرف قال هذا بيت ابن لبدة قلت لاتستعجل انت حول

حول الرجال وجلسنا على واحد من الكمبيوترات والرجال ساكت مايدري وش الطبخة

وانا افتح على هالمنتدى وان افتح هالموضوع قلت اقر الي مكتوب قال هالحين قطعت علينا الجلسة مع الشباب واخرتها تبيني اقر في الانترنت نت

قلت يابن الناس انت اقر كلام ابن لبدة قال وين قلت شفه والرجال يقعد يقراء والله يارياجيل ان وجهه يوم يقراء انه يلتوي تقول سامعله مصيبة

قال ذا كلام انترنت نبي الكلام من فمه قلت هذا مهوب واحد يكتبه يتعطب هذا مقطع من مقابله مع الشيخ محمد بن لبدة وهذي اسم المجلة ورقم العدد ورقم الصفحة والرجال بلسانه قايلهم هالكلام وهم كتبو كلامه

ثمرة الموضوع انا عودنا لخويانا وخاطر الرجال مهوب الاول ويوم شافونا قلو ماشاء الله على طياره قلت ايه حنا ذيابة نخلص مواضيعنا بسرعة يومنكم عييتو تروحون معنا

ومن يومها ليومكم والله معاد جاب سيرة وليا تكلمنا وجت كلمه حول الديار شتلها بكلمه تبعدنا عن الموضوع

هذا الموقف الطريف لهالموضوع بيض الله وجهك علاه يالعكام