فواز السعيدي
العواده كل عود يعاين احوال الرعيّه = عصر ينقز للحلال وصبح يسرح بالعيالي !!
وانت عودٍ ماسمعنابه ولاشفنا حليّه = راعي انترنت متواجد هنا في كل حالي !!
النشمي
العواده عندكم من يوم عصر الجاهليه=شكلهم من قبل ابن غانم وابو زيد الهلالي!!
والا نا عودٍ تعلمت الحروف الابجديه=عشت عصر العلم واعرف الجواب من السوالي!!
فواز السعيدي
عندنا شيّاب ماشاالله عليهم مقدويّه = دلّهم دلّ الرجال وورعهم نسل الرّجالي !!
وانت بكره لاشهقت وجيت تكتب فالوصيّه = تكتب " انتبهو لحد يدخل على الايميل مالي " !!
النشمي
عندكم شياب عاشو بالجهل والعنصريه= يحسدون عيالهم من بخلهم ربع الريالي!!
خل علم الغيب علمه عند خلاق البريه= مار حسن الخاتمه والعفو يارب الجلالي!!
فواز السعيدي
انت تاخذ من ولدك اليانجح تاخذ حذيّه = وانته المفروض تهديه العمامه والعقالي !!
خاف ربّك واطلب الله فالصّباح وفالعشيّه = توب توب الله يبارك فيك عن درب الظّلالي !!
النشمي
الولد نعطيه مطلوبه ونشري له هديه= والحذيه لك يابو عايش على طول الليالي!!
طالبين الله ومنهجنا على سنة نبيه=يغفر اذنوب العباد المسلمين اول وتالي!!
فواز السعيدي
انت ياعود احضري دلعك عصر البرمجيّه = ماتعرف الفرق مابين المحاله والزّوالي !!
انتهى عيد ارمضان وباقيٍ عيد الضحيّه = انتبه لاعاد اشوفك يابيض اللحيه تلالي !!
النشمي
انت لو نعطيك زود اتقول مايكفي بليه=علتك عله قويه بين كبدك والطحالي!!
قول مايطري على بالك ترى النيه مطيه= ماعليه منك حافظ مكسبي مع راس مالي!!