[ترركي]

بسم الله الرحمن الرحيم


الله يصبحكـ بالخير
ابياتكـ جيدة ومافيها كسور (البيت الثاني موزون 100%)


البيت الثالث فيه تصوير رائع اللي هو :


يـصبح ثراهــا مثـل فرشــاً مغـطـاء=مـاودك الـى ترتـوي مـن مـيــاهـا



صحيح ياخوي انت تملكـ الحس الشعري اللي تقدر تكون فيه قصيدة
بدون مجاملة (انا ماأعرفك حتى اجاملك)
وانا متأكد انكـ تقدر تكتب ابيات اكثر
لكن اذا ابتعدت عن القوافي الصعبة


يعني مثلاً الـكلمات اللي تنتهي بـ(ألف ونون) كثيرة جداً
وهذي من القوافي السهلة
بحيث يكون عندكـ مجال واسع لأختيار المفردة
وتقدر انكـ تكتب ابيات اكثر واكثر


وعندكـ بعد الـ (الف واللام) (الياء واللام) (الياء والنون) (الألف والميم)
(الألف والراء) ( الواو والراء) (الياء والراء) (الألف والباء) وفيه واجد .

وراح اعطيك مطلع قصيدة لي
القافية الأولى (الياء والراء) والقافية الثانية (الالف والراء)

ياوقت ماندري وش اللي بكـ يصير = ولاندري الدنيا وش اللي بها دار
العلم عند الله والأسرار في بيــــر = والطير مايرضى يوافي بالأخبار
مستقبله صفحه ومن دون تسطير= اما الخريطة مبهمه ارض وبحار
نسري مع العالم على منهج الغير = والموج يحذفنا على يمين ويسار


واذا بغيت من ثلاث حروف مثلاً عندك : ( الألف والنون والياء)
كلمات كثيرة جداً : زماني - نساني - ثاني - ثواني - رماني
اعاني - داني - مباني - معاني - جاني - عساني- فاني - هاني
- خذاني - عطاني .......... )


عندكـ (الألف والراء والياء) : ساري - طاري - شاري - شبيت ناري
جاري - عاري - حباري - صحاري - ................. )


عندكـ (الالف واللام والياء) : عالي - معالي - تالي - غالي -
حالي - لحالي - جبالي - مالي - جمالي - جالي - خالي -
عقالي - سالي .............)


ومع الأيام راح تحس انكـ تقدر تكتب على اي قافية انشاء الله


يعني انا اول مابديت كنت اكتب على هذي القوافي
ومع الوقت حسيت اني اقدر اكتب على اي قافية


اتمنى لكـ الاستفاده والتوفيق

آخر تعديل ترركي يوم 22-Jan-2009 في 10:53 AM.