بادي المراقيب
يامعجب الليل عنا لا تغيب = بيني وبينك علوماً طايله
ما ني حريبك ولا حتى صحيب= دام العمامه برأسك مايله
معجب العتيبي
يالله دخيلك من اخفاق النصيب= في ليل والا نهار وقايله
من عقب عيد العوازم يالحبيب=شفتك يابادي علومك هايله
بادي المراقيب
عجيب والله يا معجب عجيب = يالي تنحر سيولاً سايله
المشكله العود في وسط الزبيب= الله يعين اليدين الكايله
معجب العتيبي
الذيب ياصاحبي فعله غريب=لاتامنه لو تقوم تحايله
محدٍ يصيب الهدف غير المصيب=رمّاي الاهداف راع الطايله
بادي المراقيب
حي الحضر شفت به عشرين سيب= مع كل سيباً تشاهد عايله
أشوف لي علم يبغاله طبيب= يا مادح أهل البضاعه الدايله
معجب العتيبي
حي الحظر لا تجي حوله قريب= تبلش ودمعتك تصبح سايله
لاشفت شيٍ خطا والا مريب=الحل عندي ولاني قايله
بادي المراقيب
اللي يبا السمن يقرب يا نجيب = ويسيل فوق اليدين السايله
كثر الخطأ لامنادي لا مجيب = وليا زعلنا تقول اسمايله
معجب العتيبي
ياذيب لاترتبك لاجاك ذيب=واللي يكيلك لزوم تكايله
واللي يجيلك وله رايٍ صليب=لايكون فيما يقول تعايله
بادي المراقيب
الخوف في داخلك دبك دبيب = يشين بني الجروف الهايله
يا عمدة الحي ظني ما يخيب = ودنياك هاذي تراها زايله
معجب العتيبي
يالربع بادي طلع تاجر رهيب=يرجّع بضاعة اللي جايله
ماعادلك في سواليفك نصيب=عدل وبدل وتصبح حايله