بندر المرشدي
الجذع تالي الايام جاء فيه ريبة=يلعب بسبحة الافكار لعب الاتاري
يشكر اللي مكرع في قدور الغبيبة=سيرته كلبوها فالطريق المباري
سلطان الجـذع
جيت يالمرشدي واللي على البال جيبه =خلها بيننا في سوق بايع وشاري
كلمتك ياطويل العمر ماهي غريبه =ويش رايك نعرضها هبوب الذواري
بندر المرشدي
كل عاقل معه عقله يبا يهتدي به=وانت عقلك مورا في كثير الطواري
يالجذع... لوّ تعلم وش هي اكبر مصيبة=ماتهمش علي وسعود والا السماري
سلطان الجـذع
وانت ليت إلك عقل فالزمن تقتدي به =لاغريبه نشوفك مع عيال الحواري
ماجهلت الرجال وكل رجلٍ وطيبه =مير مامثله اللي في فعوله نماري
بندر المرشدي
خل حكم القضية للرجال اللبيبة=أنت لازم تروح تراجع الاستشاري
ويش سوى بعد حطوه فالوقت عيبة=صار يحشي بها (....) تكرم هذاك البخاري
سلطان الجـذع
واحدٍ يوم يرمي مايصيب الضريبه =لايشيل الحزام ولايشيل السواري
لاتضحك على نفسك قبايل عتيبه =راعي العرف يدري وانت ماانته بداري
بندر المرشدي
من يدنق عن الواجب ويرضى الغليبة=ودك اتنقز عيونه بروس الشباري
اسمعوا يارجال العرف وش يدعي به=هرج فاضي من المضمون والحق عاري