سلطان المنصوري
سلامي سلامن كنه البن والهيل=وجوب العتيبي عند ربعه عتيبه
والا يالعصيمي نسبر البرق والسيل=لعل الحيا يصل الديار القريبه
مستور العصيمي
هلا مرحبا يانور ساطع مع الليل=ليا بان في وسط السما ينسريبه
ياسلطان كان الحرب بالهجن والخيل=وذلحين صاروخاً يجيب المصيبه
سلطان المنصوري
ابا نشدك عن راع الجمال المحاميل=يقولوون عود بين شكه وريبه
تساهيل يامستور راحت تساهيل=ترانا نعرف المخطيه والمصيبه
مستور العصيمي
احب العميل موفي الوزن والكيل=واجنب عن اللي مايقدر صحيبه
لكن اعبدو شارونكم ياسرائيل=حكمكم رضا مدري حمككم غصيبه
سلطان المنصوري
اجل خلنا نسري على الجدي وسهيل=ولاهي على مثلي ومثلك غريبه
انا ماعبد الا الله ياحيل ابا الحيل=ولانلتفت فاهل الوجيه الغضيبه
مستور العصيمي
توكل على رب الملا عادل الميل=وموضوع مايختصنا وش نبيبه
من اول تهد اجبال وتشيلها شيل=وذلحين صارت يالعتيبي صعيبه
سلطان المنصوري
يامستور نطمع فالليال المقابيل=عسى الديد يامستور يقطر حليبه
ابا القا اليا دورت بعض المداخيل=ولابد جرح الوقت نلقا طبيبه
مستور العصيمي
تبعد عن المنقود والقال والقيل=ترا الرجل مايرضى بعلم الغليبه
معك لو وصلت اسهيل والنجم ابوذيل=تحفر القبر والا تجيب النصيبه