[بدراني دوسري]

تقول ( لا عدوان الا على الظالمين)
واقول ان الظالم هو البادي بالتعدي كان الوهبي قبله وردينا عليه ثم جاء الشبرمي وتطاول على ال زايد في تاريخ 28 فبراير وما احد رد عليه منكم يا تميم
وين كنت يا راعي الصمان ما انكرت على ابن عمك تهجمه على الدواسر اللي من اشهر العرب كرما وشجاعة
فرديت عقب طول انتظار حوالي شهرين وحنا نحتري !!! ما غير الشهم اليعربي الي ذب عنا جزاه الله خير.
فالبادي اظلم ويستاهل ما جاه

ثم تقول انك اكثرت من زوبعاتك؟؟؟
انا ارسلت اعاصير ما هي زوابع على من يكتب في الانترنت وهو جاهل بانساب العرب واخبارهم مثلك انت اللي تقول نسب الدواسر مشتت بين القحاطين؟؟؟

ويش هالخرابيط!!!!! ترثة الملطوم مشتت نسبهم !!!
قل كلام يقبله العقل ولا ترفع راسك على من هو اعلى منك وحنا اللي نصادق على انساب غيرنا ماهم انتم اللي تصادقون على انسابنا وحنا امراء في سدير والمحمل حنا يا البدارين.

ثم تقول لا اود الخوض ثم تعود وتخوض !
وتحطنا في قيس عيلان
القيسية ونعم ولو حنا منهم ما انكرناه !!! ليش ننكر لكن اللي يثير مثل هالخرابيط في المنتديات مثل اللي يتكلم في الوهبة ويشكك فيهم هم من تميم والا عكل وفيكم يا تميم من يشكك في العرينات جماعة ابن شوية ويحطهم في تميم وناس يحطونهم في بجيلة وناس في قضاعة والاساس هم من سبيع وهم ابخص
وما تركتم يا تميم الجبلان في مطير نسبتوهم لبني جبل من تميم
وحتى المزاريع في الغيثات الدواسر رجعتوهم تميم
فالمشكلة في من يكتب في انساب الناس ولا يرجع لهم اصحاب الشان

مثلا: عندنا حنا يا الدواسر ان الحناتيش في روق اصلهم من حناتيش ال ابا الحسن المساعرة ويروون قصة نزوحهم ،،،،لكن نسبهم اي الحناتيش جماعة ابن محيا هم ادرى بنسبهم وهم اللي يقررونه مهوب غيرهم


ثم تتهمني بالكذب ليتك تجيب كذبة وحدة قلتها!!


وتقول لا يوجد نص صريح يثبت الدواسر في الازد
دليل قطعي على غبائك ولا شك في ذلك لان اساس النسب هو الموروث الشعبي للقبيلة وهو اننا عيال زايد الملطوم ابن الملك اليماني وجاء جدنا من سد مارب ونزل على تغلب ،،، نحفظ هذا ونردده ونسمعه من الاجداد اللي سمعوه من اجدادهم
ومع هذا يوجد عشرات النصوص واوردناها لتدعم الموروث الشعبي عندنا
وتلقى هذا في ردودنا السابقة،،، كونك ما فهمت شئ او عجزت تفهم فهذا مقدار عقليتك فالله يعينك على نفسك!
ولا حنا بحاجة لك انك تفهم او تصادق على نسبنا

والنصوص الصريحة ذكرتها وجبت صور منها في المنتدى هذا وفي منتدي الدواسر

لكن لو طبقنا منهجك في علم النسب وانه لازم كل قبيلة تجيب نص صريح
فتعال انت -- طبعا انا ضد هالشئ لانه من اساليب الشعوبيين اللي يبون نصوص والعرب امة جاهلية لا تقرا ولا تكتب وخاصة البادية -

عطنا نص صريح يرجع وهيب جد الوهبة في تميم من كتب الانساب القديمة
وعطنا نص صريح من كتب الانساب القديمة يقول من هو جد العناقر وكيف تلحقه في تميم لا تقول هم بني سعد لمجرد تشابه المنازل عطنا اسم جدهم وكيف يرجع لتميم
وعطنا اسم جد النواصر وكيف رجعتوه على طول لبني عمرو ووين النص القديم من كتب الانساب

طبعا كل اللي قلته لا يقبل به العقل لان اساس النسب الموروث الشعبي عند ابناء القبيلة واللي حولهم هذا الاساس اللي نعتمد عليه

ومع هذا الدواسر يحفظون انهم من الملطوم ويوجد نصوص كثرية ذكرناها لمزيد من التدعيم للرواية الشفهية

اما كلامك عن الحباش والفرس فهذا دليل اخر على ضعفك في التاريخ فالملطوم عاش في زمن المسيح 600 سنة قبل ميلاد الرسول صلى الله عليه وسلم وولده عمران انتقل من الحضارة والملك الى البداوة ونزل على تغلب القبيلة البدوية وعاش معهم وتزوج منهم وجاءه الازد والحجر
وابن الكلبي النسابة المعروف نص صراحة على ان الازد لقبه دوسر
فصار ابناءه هم الدواسر

والاحباش جاؤوا فازعين لنصارى نجران على ذو نواس اليهودي وهو من حمير وكان ملك على قبائل حمير بن سبا وليس كهلان بن سبا فافهم
وملكوا الحبشة اليمن والحجاز ووصلوا مكة فلو قلت وين قبائل قحطان ارد عليك واقول وينكم انتم يا قبائل عدنان ايضا
وسيف بن ذي يزن الحميري استفزع بالفرس على الحبشة

اما الدواسر فهم ذاك الحين في الربع الخالي ما يدرون عن شئ
لكن الظاهر الحاقد على عرب قحطان هو انت يومك تذكرهم بالفرس والحبشة
مع ان تميم قتلوهم الفرس في المشقر وفعلوا بهم الافاعيل
فمن هو السطحي انا والا انت؟؟؟

وعلى كل حال انا ما تكلمت على تميم الا ردا على تهجم الشبرمي على الدواسر واكتفيت بجدكم تميم بن مر بن اد بن طابخة