مساكم الله .. بالنور ..
قصيدة .. في قبيلة عتيبة
وشيوخها .. رحمهم الله
حنا سوات الحر وقت الصقـارة = كسابـة الطالـه كعام الغزيـة
كم حلق طاغي ضاق فوقه زراره = يومه تمادى في غـواه وخطيـه
منزالنا في نجد خضنـا غمـاره = يوم القبايل بيـن هـاذي وذيـه
منزالنا في نجد واعلـى ديـاره = جاني بحد السيـف ماجـا منيـه
لاسيقت العطفة يـذوق المـراره = من قابل عتيبـة رجـال الحميـه
تركي ولد صنهات يعرف مساره = حدربنا في نجد نجد العذيه
اقول ابن هندي زعيـم بجـداره = واقول ابن ثابت جزيـل العطيـة
( لاثور الدخان قبس الشـرارة ) = مناحي الهيضـل زبـون الونيـة
ومن قابل ابن فهيد يلقى دمـارة = وابالعـلا يـارد عـدود المنيـه
وخزام من لاقـاه ذاق الخسـارة = وشبيب يلطـم مابـه المرحميـه
وعبيد بن عبود مجد وصطـاره = لايبست الاريـاق حـل القضيـة
والضيط وشليويح عزم وجسارة = وان كانها عـدت كثـار البقيـة
ذولا رجال الدين ذخـر الامـارة = من لايح العارض ليااقصى الحوية
باق الشيوخ ونعم قلتـه جهـاره = جـدن ورا جـدن وباالأبجديـة
مثل المطر لاحان وقت انحـداره = هلت هجوسي من معـان نقيـة
بيتي حبكته يوم زايـن عمـاره = في عزوة بالطيـب دايـم غنيـة
وانا مثل مخلد واتابـع مسـاره = ابيوت جزلـة والمعانـي قويـة
وصلات ربي عد رمـل الزبـاره = على شفيع الخلق خيـر البريـه
وسلامتكم ..
ملاحضة : ( لاثور الدخان قبس الشرارة ) البيت مقتبس
من الشاعر الكبير .. سمران .. عايض القثامي