[النايع]

ياعيد ياعيد عاد العيد ياعيد

كيف حال أبناء العمومة

يسرني أن أقدم لكم هذه القصيدة المتواضعة.
أتمنى أن تعجبكم

يا عيد يا عيد عاد العيد يا عيد = وأنا السعاير توقد في كنيني
العيد فرحة وانا عيدي تناكيد = ولا يجرح العيد يا كود الحزيني
والناس ترقد وانا ليلي سراميد = ليلٍ تعدى وليلٍ مقتفيني
والله يا لولا الحيا وادرى المناقيد = لا اصيح وارمي ثيابي باليديني
واقول ردوا حبيبي نقوة الغيد = تكفون تكفون ردوا لي ضنيني
يا عيد يا عيد أنا عن قربه بعيد = تفرق الشمل يالله يا معيني
تذكر دياره وراء حزم الجلاميد = وأنا دياري وراء هاك البطيني
من دونهم يالعتيبي حالت البيد = حال النيا بين محبوبي وبيني
داره بعيدة ومن دونه جراهيد = والحد والسد والحصن الحصيني
أغرق عيوني من العبرة تراديد = واحيان أكظ الزعل واقسم يميني
لولاي أسوي لدمع العين تبديد = ليسيل وادي الرمة من دمع عيني
لا سال له في سطى وجهي تخاديد = سكاب وبله مثل وبل الغشيني
واللي جبرني وشد برجلي القيد = غِلّي وهجري ولوعات السنيني
وكبدٍ فلقها هوى منتوقة الجيد = من حسنها كن ما بالخلق زيني
ياما لبسنا من الفرقا براجيد = وياما رقينا الطوال اللي تبيني
وارقب بعيني شمال وعنه ما احيد = نجم وراء الشام اخيله كل حيني
والله لو عذربوا في الأباعيد = ما اخلف طريقي ولا اوطّي جبيني
ما اريد غير اقرن الحجان ما اريد = ولا همني كثر هرج العاذليني
العشق ما عذرب الناس الاجاويد = وملوك سنّوا طريق العاشقيني
وكمٍ عديدٍ شديد من الأواليد = امسى من العشق مقصوف الوتيني
عقب التعاجيب هالوا فوقه الحيد = وحطوا على رمّته لبنٍ وطيني
والعشق قبلي بلى عليا وابو زيد = والعامري قيس لا دنيا وديني
مجنون ليلى وانا مجنون تغريد = وما جاه يا خوف قلبي لا يجيني
يا محيي العشب يا مفني النماريد = يا بالي العامري لا تبتليني
واغفر ذنوبي وبعّدني عن الكيد = واحسن ختامي قبل يومي يحيني
وسلام ربي عداد الرمل ويزيد = على محمد شفيع المسلميني

وسلامتكم