[ابن سلوم الهيلوم]

مفردات الشعر عدا يارده من مد حبله

وكل من زاد امتداد الحبل طول يطول بوعه

فيه قرهودا يشرف من شرب منه وشرب له

لذة للسامعين ونادرا شكله ونوعه

كنه دموع السحاب ويشفي المجروح وبله

من مناشيه الهجوس ومفرداته من دموعه

تختلط فيه الدرر بمجوهرات وينتعب له

وياهجوسي حاجتي تحتاج مبداه وطلوعه

ماتعدا طالبه ومترجمه واللي كتب له

يستشير بشي مدري شي ينها عن وقوعه

واجب المسلم على المسلم كبير وينحسب له

والكريم اكثر مواجيبه على باقي ربوعه

مثل شبل ذوقه ربي ملذة شوف شبله

وفي العرين الليث مايحتاج له فرقا ولوعه

مايريد فراق شبله لو تضاهر به وقبله

كود يرضى بانتزاع الضلع الاوسط من ضلوعه

كيف وصف احساس من رايه يعودون العرب له

يوم يلقى درعه الواقي ينطل في دروعه

الرضا له والكرامه والعصا له والعتب له

فرض ومؤكد على المسلم وفي قربه مطوعه

كيف يخسر مكسب كم خسر في العمر وكسب له

ماهناه رقاد والا زاد قبل يسد جوعه