عايض زوير
من هاجسٍ غنّى بدون شعور ع الطرق الطويل=سلام يا خالد تبا تقراه كنّك تسمعه
دام الوفا هو منطلق عهد الزماله و الزميل= مثلك عنِه ننشد و ناخذ علمنا من مجمعه
خالد الزيد
يا مرحبا يالصاحب اللي عندنا كنِّه عديل= حبل العلاقه بالوفا و الطيب يربطنا معه
يخوك ذا الايام واحدنا كما حطّاب ليل= يبغى الحطب لكن يجهل عاقبة ما يجمعه
الحَرّ خلانا نيمم لليمن نبغي سهيل= بس الرطوبه بالجبيل اتزيد و اتضيق السعه
عايض زوير
دام البقا بك و انت ما قدرك مع اصحابك قليل= توفي، و من يوفي هواة المرجله ما تقطعه
ما لك و مال الرّقه اللي بالمداخن تستطيل= عوّد على الديرة و كوّع في ظلال المزرعه
الدلّه ام قناد/ و البرّاد/ و الجو العليل= تسوى حياة اهل المدينه كلها متجمّعه
خالد الزيد
لو الهوى لي كان كل اعصير في ظل الظليل= ثهلان ابو رجمين ما كلّن تهقوى يطلعه
لا شك ورعاني المقرّد مغرمينن بالجبيل= و مدارسه زينه مهي مستاجره و امقربعه
و الديره اللي تحتوي رزقك و لا انت ابها ذليل=خلِّك بها لو كان منته من اهالي المجمعه
و ان عاش راسي لين يستافي العميل من الجميل= لا ارجع لداري ثم اخلِّيها سواة الصّومعه