وصل العطياني فالنظم
قصيدة رحنا على أفواه المهبـّـل مساويك ..!!
خوّة عزيز الأصل تبقى كما الشيك
حتى لو أنه عـن ديـارك تنحّـى
وخوّة خبيثين الطبوع الصعاليـك
أقْصر من مفلّى الغنم فالمضحّـى
واللي على شأن المصالح يخاويـك
ليا انتهى منها ؛ بصحبتْك ضحّـى
واللي يبيعـك لا تحـرّاه يشريـك
والمزن لن جات العواصيف صحّى
وياللي ابليس مفشّخٍ بيـن أذانيـك
قلبك عليه ستـار مـا ينتصحّـى
بالهرج تقفانـي وتنفـخ علابيـك
هذي رجولة نعنبوا ذا الملحّـى ؟
أنا ليا منّي بغيـت الحكـي فيـك
هرجت باللي فيك وأذنـك توحّـى
ألقاك قـدام الرياجيـل وأعطيـك
كلمـة بسبّتْهـا نسمْـك يتفـحّـى
رحنا على افواه المهبّل مساويـك
وحلوقهم من وسعها مـا تسحّـى
قصيدة أقوى من البيرة..!!
العام قلبي معذّبنـي يبـى الدّيـرة
واليوم ما يعشق الديـرة ولا همّـه
قلبي ما غير أشغله عقلي بتفكيـره
وأنا ضحيّة ثنيـنٍ مـا لهـم ذمـة
خلوني أقعد وراحـوا يالله الخيـرة
مع بنت شيخٍ يصرّ العلم في كمـه
بنتٍ صغيرة وعندي ما هي صغيرة
أشوفها عندي أروع بنت في الأمـة
لو شافها اللي مايعرف للهوى سيرة
يلزم شعر رأسه ويخطيـه ويخمّـه
من زينها خلّت العقّال فـي حيـرة
أطيب ولد عمّ يحْسدها ولـد عمـه
الزين ما يستطيع العقـل تصويـره
بس الأكيد إنّها ترقص على القمّـة
أخذ عليها القمـر لفـة وتدويـرة
قالت وش المشكلة قال أنتي مهمـة
والشمس قدّام تغرب جاتها مغيـرة
وفلّت شعرها الطويل وقامت تلمّـه
والورد الأحمر بهيج اللون ما غيره
من حينما شمّته والشمـة الشمـة
راح يتثنى على بعضه من الغيـرة
وعلى شفاها تكسّـر وانتثـر دمـه
وترياقها للمزاج أقوى مـن البيـرة
رشفة منه تِنْسِي الواحد حليب أمه
والباقي من الوصايف تمّ تشفيـره
لو أتمادى شويّـة جيـت بمطمـة
الحبّ أبا أموت وأنا أدفع فواتيـره
ماهو برايح وباقي شي في الذمـة
قصيدة مـيّـت دماغيـاً
غرقت في الحب من رأسي إلى ساسي
وما زلت في بحـره الغـدّار حاليّـاً
الظاهر إنّي غشيم وما اعرف قياسي
حتى تجرّعت كـأس المـوت فعليـاًّ
وأصبحت منحاس والتفكير منحاسـي
والخدّ يروى مـن العبـرات يوميـاًّ
إن ناموا الناس رحت وجبت كراسي
وترجمت مشاعر الأشـواق شعريـاًّ
أطلق عنان القصيد ودقّ هوجاسـي
هذي علومي علـى هالحـال ليليـاًّ
من غيبتك يالغلا يا عقـد الألماسـي
لا والله أغلى مـن الألمـاس دوليـاًّ
راحت علومي بَعَدك أخماس وأسداسي
ما غير أترجم لك أشواقـي غيابيـاًّ
وسوالفي لوّ في موضـوعٍ سياسـي
أجيـب سيرتـك فيهـا لا شعوريـاًّ
القُرب نعمة لا صار القلب حسّاسـي
والبعد يثّـر علـى العشّـاق سلبيـاًّ
وإن طوّل البعد أبا آكلها على رأسـي
هذي هـي نهايـة العشّـاق حرفيـاًّ
لو ما تشوفك عيوني يا بعـد ناسـي
والله لتلقيـنّـي مـيّـت دماغـيـاًّ
بس إجبري خاطري قبل ألفظ أنفاسي
وأروح وأفـارق الدنـيـا نهائـيـاً
رسالتي وصلتك من صادق إحساسي
وأنا غريقٍ في بحـر الحـبّ حاليـاّ