السلام عليكم ورحمة الله وبركاته ,
وسم العطاوي : مطرقين مطرق على الرقبه + مطرق على الخد ويقاله (الدامع)
وياسمونه ذوي عطيه من الروقه من عتيبه وهم (المهادله الفراهده الخراريص القساسمه الغنانيم المغايره السلسه الحبرديه المورقه)
وهو وسم مشهور وله شعبية حيث ان اطلقو على الابل اللي عليها وسم العطاوي (ماخوذه موفره)
لاحتماء اهلها لها ,
ومما قيل فيها من الاشعار ْ
الراوي الشاعر / متروك بن متعب الفراهدي رحمه الله
ودنــوا لها اللي يوم قـــام بزهابه ,, وشــــدوا لهــــا فوق اركبي(ن) سهاوي
يتبع لها شــــول(ن) تجـــــــاود رقابه ,, شـــول(ن) سهاف ووسم اهلها العطاوي
الشاعر/ بدر بن خضير القسامي العطاوي
يامن خبر وسم(ن) من الفعل عيفي ,, وسم العطاوي يامرب الطلايين
الشاعر/ شقير الجذع العتيبي
لين تنظر مطرقين على جرد الرقاب ,, وسم ربع(ن)يطرحون المجوخ دونها
العطاوي فوق الارقاب ذهاب(ن)واياب ,, ترتع الدار المخيفه وهم يحمونها
لاسبرها شيخ قوم(ن)وشاف الوسم هاب ,, رد ربعه دونها قبل لايشعونها
خايف(ن)من ساعتن تقصر اعمار الشباب ,, لارقص شيطانها واعتزا مجنونها
الشاعر / جري بن حشاش القسامي العطاوي
اقطف المكر والقرنوه غير الشتيله ,, ياخطات السناد اللي عليها العطاوي
وسم ربع(ن)لياجات العلوم الثقيله ,, يجدعون المجوخ قدم رمي الشواوي
الشاعره / مرسى العطاويه
ياللي تصوت باللبن مالنا فيه ,, عان اللبن مكفاة عبلة ملاوي
فاقصى الينوفي والدعيكه حراويه ,, فديوس خلفات(ن) عليها العطاوي