ومن المحاورات الجديدة والمشوقة التي جرت مؤخراً لشاعرنا حبيب العازمي مع الشاعر سلطان الهاجري هذه المحاورة الرائعة والتي بدأها العازمي بقوله:
حبيب العازمي
هلا يا مرحبا يالهاجري واطلع على المرقاب =ومد الشوف وأتشوف الجمال الحمر في الوادي
ولا تنشد ليا ضاعت جمال حمر عوج ارقاب =ترى مالك جمل غادي وأنا مالي جمل غـادي
الهاجري:
يدوم لك البقا والعلم بين الدقن والاشناب =لكن البس ولبسني ثياب بيـض وجـدادي
نجوم الليل لا حبيب حسبناها بدون حساب =وعدينا السنة بشهورها هجري وميـلادي
العازمي:
تبا تلبس ثياب العيد وأتكبرعلى المحراب =وأنا وياك فيما فات نحضر كـل الاعيـادي
دخلت القبة الخضرا ولا تقفل عليك الباب =وأنا أوحيت المنادي.. والمنادي دونه منادي
الهاجري:
تحياتي على الحضار وأشواقي على الغياب =مثل مستور ابن تركي وصياف ابن عـوادي
يا سواق السفينه سرها وأحذر على الركاب =ترى موج البحر لاهاج يغرق عفش الأجوادي
العازمي:
أبو زيد الهلالي يعلم أن الرمح رمح ذياب =ولا يقض الطلب هرجه على دلـه وبـرادي
سفينة نواح مأمونه من التفجير والإرهاب =ولو كان البحر موجه يدف السيف من غادي
الهاجري:
حقوق الطبع محفوظه عن الدجال والنصاب =وهداف البطوله ياخذ الخبـرة مـن النـادي
ألا ياللي بنيت البيت بالعمـدان والأطنـاب =ما يربطنا معك يا كود حق الملح والـزادي
العازمي:
أبو خدن من المكياج يوضي كنها المشهاب =يماري بالذلول اللي بليـا خـرج واشـدادي
وأنا واللّه ما حب الزخرفه والمظهر الكذاب =أجيب الرأي من رأسي وأشب النار بزنـادي
الهاجري:
عليه اللّه وأكبر بالعصا والرمح والمشعاب =ونار الحق مشبوبه ونـور الصبـح منقـادي
يقولون العرب ما تحمي الميسم بدون أسباب =وأنا ماني براعي صدفةٍ مـن دون ميعـادي