[حماد المطيري]

السلام عليكم ورحمة الله وبركاته


قصيده اهـديــها الى الشــيخ/ صـنـت بـن زراق الـعتـيـبـي (ابو عبدالله)

اتمنـى ان تحـوز على رضـاكم واعـجـابكـم

سلام يامنصا الرجال المطاليق = يالحر يانسل الرجال العريبه
ميزك ربي عن جميع المخاليق = زودن عليها فيك نخوت عتيبه
كسبت فعل المرجله بالموثيق = حتى ارضخت لك طيب والا غصيبه
ياشيخ وكرك فوق روس الشواهيق = اسمك ينومس كل من يعتزيبه
ترسي كما ترسي ابانات وطويق = مواقفك بالطيب ماهي غريبه
المرجله في غير حضترك ماتليق = والناس تدري ان المراجل صعيبه
الا على شروى زبون المخانيق = ابن زراق اللي به العز هيبه
نسل الحرار اللي تفك المزانيق = فكاك نشبات الظروف العصيبه
شرواه لاجيته وصدري به الضيق = يبري جروح الصدر من زود طيبه
ياشيخ في جوف الصدور المعاليق = هم ٍ وجرح ٍ ما لقينا طبيبه
اخترت من جزل المثايل طواريق = قاف ٍ بنيته للعقول اللبيبه
واختامها قدرك بجوف المعاليق = في حفظ رب الكون ما احد ٍ دريبه

وسلامتكـم واعـذرونا على القصور يالنشــاما

حماد بن سعود المطيري

آخر تعديل حماد المطيري يوم 04-Aug-2011 في 05:12 PM.