تكفون لا تخطون في حق راما
ترى زعلها عندي اكبر خطيه
مقبل عليها من كبير العماما
وشلون لا جت من خوال البنيه
ياناس راما مثل بدر التماما
لانور على ريضان نجد العذيه
للزين في راما محل ومقاما
تفردت بالزين صبح وعشيه
الخد يشبه بارق (ن)بالظلاما
لاقبل من القبله يسابق لضيه
والعنق كنه عنق ضبي العداما
لامن تمشى بالفياض الخليه
والعين عين اللي على الصيد حاما
حرن فريد ومنتقينه نقيه
والخشم سلت مصقلات الحساما
لا صاحو الفريس واهل الحميه
والقرن قرن المهره ام اللجاما
اللي ذبح من دونها الشيخ حيه
منهو خطا في حق راما يضاما
ومنهو وقف في صفها واهنيه
عمامها من روس قوم(ن)حشاما
وخوالها حماية(ن)للونيه
بفعولهم مثل الحرار الحداما
اللي على ضرب الثنادي صطيه
وتكفون لا تخطون في حق راما
ترى زعلها عندي اكبر خطيه
سعد بن مناحي بن محمد بن عوجان الرويس