من القصايد اللتي أعجبتني مساجله وجدتها بين الشاعر ثعيل بن حسين العتيبي والشاعر المعروف على محمد القحطاني
وحبيت أنقلها لكم.
يقول الشاعر ثعيل بن حسين العتيبي:
سلام تسليم(ن) على كل قانون = يخضع له القاضي جناح العداله
مني لأبو ميسون فكره ومضمون = نهدي القصيد ولانعده جماله
ماني مصدق في علي لو تقولون = قريت شعره وأكتفيت بمقاله
لو حط من شعره مع الشعر مليون = عرفت شعره كن قافه لحاله
في صفحة الكوثر وصفحات ميسون = يلقابه السائل جواب لسؤاله
سليم في معناها والنص موزون = اوضح من العنوان فوق الرساله
والبيت لاناقص ولا هوب من دون = وانا اعتبرته للقصيد انتقاله
من كثر ماجرب وماشاف بالكون = يستوحي الابداع قوة خياله
ياعلي فيك الحب والحب ملعون = علم الهوى متخصصن في مجاله
وانا ياعلي مثلك مولع ومفتون = بااموت من حب البني لا محاله
يهيم قلبي في هوى عيون وعيون = ياعلي مدري عقل ولا جهاله
هذا و خصيتك بالابيات ممنون = بس التعرف مقصدي والزماله
لامدورن حاجه ولاني بمديون = كل(ن) على ماقيل يغنيه ماله
رد علي القحطاني
حي الله اللي يبدع القاف بفنون = بداع الابيات الحسان الجزاله
عد الحجيج اللي لبيته يحجون = ماسلم المسلم على البيت وآله
سعوا وطافوا ثم قاموا يصلون = من تم حجه شد لااهله رحاله
ابيات عذبه كنها در مكنون = ولاعنب وادي ظهر في اسلاله
اما نثرها كالبرد صافي اللون = او صفها صفت ثنايا الغزاله
ليته قراها ياثعيل ابن خلدون = اما اعترف ولا اعطاك الزماله
ياثعيل كل الناس زيك يحبون = وانا رمتني فاالمبرز غزاله
في عينها اليمنى قصيد ابن لعبون = وفي عينها اليسرى الهوى والثماله
جتني مع الشارع تمشى على الهون = ومالت بقلبي وانقطع من احباله
حورية(ن) ماضمها قصر هارون = ولاجنو ب الشام ولاشماله
هيضت في قلبي من الماضي اشجون = وقتن مضالي مع غزال السباله
وامسيت كني بين الاضلاع مطعون = وونيت ونة عود فارق عياله
من ونتي من سمعها قال مجنون = ماهو بعارف علتي من خباله
العشق يابن حسين للناس مسنون = من مات قلبه وش تبي في قباله
آخر تعديل سلطان نايف العضياني يوم 06-Mar-2011 في 02:46 AM.