حبيب العازمي
طلع هوق هوقن للمنصه وناداك
يا سلطان بن وسام توني بريه
يصارعك حتى تنسحب ويتحداك
ولو كان فرق الوزن طبعا قضيه
سلطان الهاجري
انا ما علمت الا يميني بيمناك
ومن طاح راح بذمة العامريه
تحيزم وانا في ذمتي ٍ لتقفاك
واسجل عليك مصارعه عالميه
حبيب العازمي
ادورك فوق الارض لين اني القاك
يا راع الشداد اللي غدا والمطيه
ما تدري لو ان الله على خير درباك
مثل ما تدربت عام الاول طميه
سلطان الهاجري
سلامي على هاذا وهاذا وهاذاك
ليا لاح برق المزنه العقربيه
انا ما نزلت ابها على الحمض والراك
اسوق الركايب للفياض العذيه
حبيب العازمي
نخيتك ثلاث امرار واليوم ما انخاك
كبنك خفير ولا تعرف التحيه
انا ما اختلف قلبي ولا اغر معناك
اقول الحطب موجود والنار حيه
سلطان الهاجري
وانا ما اقدر امرك كذا واتعداك
لابد اخبرك بالغلطه المطبعيه
جواز السفر من ليت الاول بمخباك
واظنك نويت الرحله المكوكيه
حبيب العازمي
ليا جيت من جابك يا سلطان وداك
انا ذمتي من ذنب غيري بريه
ليا شفت فالركاب مثلك وشرواك
رميت الجواز وصورة التابعيه
سلطان الهاجري
علامك تناساني وانا ما اقدر انساك
كبني خوي ٍ ما يخلي خويه
تصلي وطاحت عمتك في مصلاك
في عيد رمضان وقبل عيد الضحيه
حبيب العازمي
انا اللي يكدر عيشتي هم فرقاك
كبن اللكاعه فيك ما هيب فيه
اصلي لكن ابليس ينحاش مناك
ليا كبر المسلم تبعد شويه
سلطان الهاجري
اجل روح جعل الله يحفظك ويرعاك
ولا للرعيه غير راع الرعيه
انا خايف ٍ بعض المطايا توطاك
من الفزعه اللي خاتمتهم رديه
حبيب العازمي
ترا الحر ياقع في حمامه وشباك
ولا تحت حر الشمس للحر فيه
انا ما عطيتك شي مير الله اعطاك
ولكن خل اكلك بليه بليه