بسم الله الرحمن الرحيم
السلام عليكم و رحمة الله و بركااته
أقدم لكم مساجلة بين الشاعر / منيف لفيان العازمي العتيبي
و الشاعر القدير / مطلق الصوينع الدعجاني العتيبي
منيف العازمي :
يا مطلق القلب كاثرتن مشاغيله=يلعبه الوقت مطلاعن و منزالي
والوقت ماهوب صافي لي ولا اصفي له = ماني بصافن معه و شلون يصفالي
أليا فضالي فنا ماني بفاضيله = وليا فضيت أله هو ماهوب يفضالي
فاصبحت قلبي مطولتن مراحيله = تعب القدم بين منزالي ومرحالي
واللي بقلبي ماهوب البعد وأجيله = لو المدى البعد لن ماجيت له جالي
خلي قريبن ولا تاصل مراسيله = ومهما بذلت الجهد ماجاه مرسالي
ما هوب هين و صعباتن مداخيله =بابن بلا مخرجن مافيه مدخالي
مايسمع الحكي ولا اروح واحكيله = قصة غرامن لها تاريخ وأمثالي
فاخطيت حبله وصادتني محابيله = صارت حموله ماهيب اخفاف وثقالي
احدن شكالي و احد يالقرم شاكيله = واللي شكيت له جايه مثل ماجالي
في سابق الوقت راضي لي وراضيله = واليوم ماني براضن له ولا ارضالي
كلن على ماحصل يأخذ محاصيله = وأنا حصيلي من المجمول غربالي
مطلق الصوينع :
أبيات جتني من اللي وافين كيله = العازمي يشتري و يبيع في الغالي
رفيق ومن القبيلة واحتمل شيله = اخفاف ولا حمول أجمال و أجزالي
منيف وده يسرج سابقة خيله = لكن يخاف أنها ما تقفز الجالي
والله لا قف معه و انصاه و اعنيله = واني لخاويه لو هو في أشهب اللالي
لو كان طار السفر مانيب هاويله = يلحق خسارات في الأحوال والمالي
أيضا و قلبي مجودتن مواصيله = مشبوك بيدين ناس فرعهم عالي
قلبي من سنين ما يخلف مداهيله = في نجد قلبي سكن ومريحن بالي
فيه المها راتعن في وادي سيله = يفيض تحت اجبله في ذيك الأسهالي
فيه الغزال الفريد ارخى عثاكيله = ويجفل أليا ذيره فالجو خيالي
أريح البال وسط الصيد وامشيله = أليا تفكر و فاخت درب مدهالي
يا صعب صيده ولا ينصاد بالحيله = خشف المها قطعن رجلي مع نعالي
ريمن جميل ونزيه ولا يجي ميله = جميل ومجمله جده بالافعالي
ياما قضيته من الأيام و الليله = اعدي الرجم لعل يتهيالي
شوفه و بسايره وامشي و اناديله = لعله يلدلي ويريح احوالي
يا ريم نجد العذيه حطي الشيله = والبرقع اللي يزود سرعة أهبالي
أبا تمتع وابى اخذ وقت تعليله = حديث نظرات ولا انوخ أرحالي
الزين يا منيف صعباتن تماثيله = وقلبي يحب الجمال ويشغل أعمالي
حتى و لو أنه شقي يا منيف أبشقي له = أخير عندي من السفره على الخالي
لبنان ولا مصر مانيب ناويله = في نجد ابى انصى الوفا و ورد أحبالي
والرجل كيفه يقند في معاميله = وقهاوي الشام نتركها للأنذالي
أخير للرجل ما يكسر فناجيله = يصونها ويتخير زين الأقبالي
اتمنى ان تحوز على رضاكم ,,
يوسف العازمي