[المعتبر]

سلام يا غيث المواطن والأوطـان=سلمان سلمـان السعـد والبطولـة
محبوبنا الوافـي سلايـل كحيـلان=اللي يعـز الـرأس فعلـه وقولـه
راع الشكالة والبسالـة والإحسـان=والقـول لا قالـه يقـول ويطولـه
هو فيه أمير للعرب مثـل سلمـان=النـادر اللـي نـادرات فعـولـه
والله يا أنا ما أشوف مثل أبو سلطان=في العالم الموجود عرضه وطولـه
الله يخلي للعـرب طيـر حـوران=هو عون والله من تضـده حمولـه
ملوكنا درع الوطن شأنهـم شـأن=كم واحد من كربتـه فرجـوا لـه
وضع الجزيرة قبل يأتون وش كان=كان الجهل والشر له فيـه صولـة
فيه الظمأ والجوع الأزرق زويـان=وإبليـس فيـه مسرجـات خيولـه
وفيه الفتن والخوف والناس عدوان=والخيـر فيـه مقطعـات سبولـه
لين الله أنقذهـم بذربيـن الأيمـان=اللي لهم في الوقت صولة وجولـة
العادلين مناصـرة خيـر الأديـان=اللي جمايلهـم علـى كـل دولـة
في ظلهم صرنا بني عـم وأخـوان=وساد الأمن والخير سالـت سيولـه
وفي ظلهم مات و خزى كل شيطان=والشر ذب الريـع يسحـب ذيولـه
وفي ظلهم علم وحضارة وعمـران=والشعب طال بظلهـم كـل طولـة
لكـن بلانـا الله بناقـة عريمـان=إمـا عـدت وإلا تقـول معقولـة
ناس عن الإسلام والحـق عميـان=الفكر غـادي والعقـول مغسولـة
والعلم ما معهم منه غيـر عنـوان=والدين ضايـع والقلـوب معلولـة
على الفسـاد يدفهـم كـل خـوان=ثم جوك كـل شايـل لـه حمولـة
واشتالوا الآثام مـن دون حسبـان=والشر والإرهـاب طبـوا وحولـه
هدوا بمعول هدمهـم كـل بنيـان=ما ميزوا شارون وش قدمـوا لـه
لكن يوم العـرض للحـق ميـزان=كـل يبـى يلقـى نتايـج فعولـة
الفتنة العمياء تبـي علـم وسنـان=قـدام فتـق مـا ترقـع خلـولـه
شر يـروج بيـن ناعـق وفتـان=لكن عند أهـل الزعامـة حلولـه
والحل بالدعوة وبالسيـف شامـان=من لا تراجع عن ضلالـه يزولـه
ومن تاب زال العفو كسبان كسبـان=كم واحد ضل ورجع واسمحوا لـه
الحق واضـح ياحديثيـن الأسنـان=توبوا وخافوا ربكم وارجعـوا لـه
قدامكـم نـار تلـظـى وديــان=بيوم يشيب الرأس من عظم هولـه
نبينـا بيـن لنـا الحـق تبـيـان=ولا فيه قول عقـب قولـه نقولـه
والعلم لـه منهـل وللسفـن ربـان=بر الأمـان بهـن سهـل وصولـه
مشـرع للـي يبـى الدين بيبـان=ما أحد يرد مدوره عـن دخولـه
العلم يرجع به لمثل ابـن فـوزان=وغيره وغيره من نـوادر فحولـه
والمفتي آل الشيخ وابـن لحيـدان=اللي على هدي السلف برهنوا لـه
واللي يشن الحـرب زورٍ وبهتـان=مـا همنـا حربـه ودقـة طبولـه
مخالف منهـج سليميـن الإيمـان=والخير والإصلاح ما هوب حولـه
إن قال وإن ما قال خايب وخسران=وش عاد لو حثالتـه روجـوا لـه
والليبي الحشاش حقـده لنـا بـان=ولا هي غريبة منه يرسـل خبولـه
في كل عام مضوي ٍ كبر نجـران=كم خـزوةٍ يشتالهـا فـي حثولـه
وتقليعته هذي لنـا خيـر برهـان=مغرض ومعطاً له عليهـا عمولـة
مهسترٍ قلبـه مـن الحقـد مليـان=الله يشيل النـذل مـا حـال حولـه
حنا بفضل الله على الحق وأعـوان=نحكم بشـرع الله وسنـة رسولـه
في ظل قادتنـا مقاديـم الأكـوان=أهـل العدالـة كامليـن الرجولـة
ننعم بخيـر منـه يكفينـا الأمـان=ومن لا يشوف يميز الوضع حولـه
الله يخليهـم لنـا درع وأركــان=وينصر بهم دينه ومن ناصروا لـه
ويعينهم علـى غرابيـل الأزمـان=والحـق يرزقهـم بفضلـه قبولـه
ويجعل لهم في الآخرة حور وجنان=ويكرم منازلهـم بفضلـه وحولـه

قصيدة حشر بن جهجاه العتيبي