يالله يارب إرحم حالي=خلّي راح وصرت لحالي
ذقت المر من بعد الحالي=واصبحت بحالٍ يرثى له
تايه فكري , ضايق بالي=ممشي غير الهمّ إقبالي
في مقفاي وفي مقبالي=ياشين اللي هذا فاله
من بعد فراقك ياخِلّي=مثل اللي فـ الخلا خِلّي
أصارع همٍ داخِل لّي=وفراقك سبّة مدخاله
حتى روحي مهديها لك=ومخلّيني هايم هالك
مثل الونيت المتهالك=من صدّامه لا تمثاله
كنّي معطي فجِ خالي=لا بن عم ولا بن خالي
أطرد لبّاس الخلخالي=مثل اللي يطرد فـ ظلاله
صرت مهزهز , ماني راسي=همّ الفرقا كافي راسي
مرّ أقرأ لآبو فِراسِ = ومر أغني لاله لاله
في قلب الهاوي ويل أمة=وياوي كما ياوي لأمه
أثر العاشق ياويل أمه=يذكر خله وينسى حاله
مهما شاب وقفـّى سنّه=يبقى حبّه مثل السنّة
ساعة يصفي يضحك سنّه=وليا كدّر طشّ عقاله
يموت ولا ينسى خلّه=لو حطوا خلّه شيخِ لّه
قال أرضى . ما فيها خِلّة=ويوقّع له هو وعياله
أفوّض أمري للهِ=ينصفني من خلٍ لاّهي
زد قال أبعد ؟ قلت إلاّ هي = وأبعد ما لقّاني باله
لكن حالف منسى حبه=وليا جاني لآرحب بّه
يجلى همّي حبة حبة=مايشفيني غير وصاله
أبغى انسى كل اللي جاني=حشمة خدّه والأوجاني
أنا المجني وأنا الجاني=هذا حكمي وأنا أشتاله

صــــــــــــــــــــــح لســــــــــــــــــانك مليــــــــــــــــــــون يا وصــــــــــل


قصيده رائعه من شاعر نعتز به كثيرا


وتقبل تحياتي