يا عيني اللي تنثر الدمـع مـدرار=دمعه ورى دمعه دموووع الغبينـه
يا عين دمعاتك على الخد كالنـار=وسّمتي الخديـن صـارت مبينـه
ربعي يقولون انت وش فيك محتار=الهـم للرجـال ينقـص سنينـه
إن كان همك بنت نعطيك واختـار=بنت الأصايل مع شجاعـه فطينـه
قلت الحقيقه سيف والسيف بتـار=السيف حده لا ضـرب عارفينـه
أبا اشرح اعلومي ولا عندي اسرار=ابا اشرح اعلومي عساها حسينـه
خلوني امضي والفلك دار وانـدار=أواه لـو تنفـع ركبنـا السفينـه
أبكتب احساسي ولو صار ما صار=احساس شاعر قام ينضح جبينـه
هات القلم باكتب على نفسي اقرار=أنا الحزين وعاشـقٍ لـه حزينـه
القدس تبكي سوروهـا بالأسـوار=وادموعها بلـت شـوارع مدينـه
تبكي صلاح وتبكي الجيش جـرار=وتبكي عمر مفتاحها فـي يدينـه
من بعدهم ذقنا العزاير والأمـرار=افعولنـا والله افعـولٍ مشيـنـه
المسلين اعدادهـم فـوق مليـار=لكن فـي الميـزان ذرة اطحينـه
هبو على الطاغي ترى الوقت دوار=يمكن تدور الدايـره فـي كبينـه
إن كان ما قام العرب مثل الاعصار=واللي على درب الخطر مهلكينـه
حنا العرب بركان خامـد ولا ثـار=يا عزتي للقدس صـارت رهينـه
محملين اهمـوم واحـزان واوزار=وكلٍ يقول اليـوم يـا الله تعينـه
وحنا العرب فالبحر نشبه لمحـار=كـلٍ يبـي المحـار دره ثميـنـه
يا ليتني يا ليتنـي داخـل الغـار=يوم الرسول وصاحبـه ساكنينـه
عشنا القهر عشانا مع صيفنا الحار=صرنا كما زيتٍ بوسـط المكينـه
يا لايمي ما عندي اسرار واعـذار=اترك هزيل القول وامسك سمينـه
القدس ضاعت والعرب تلعب الطار=لا تزعلون القرش نسمـع دنينـه
حنا العرب نطرب اليا حطو الـزار=وانشجع المهبول نسمـع رطينـه
حنا العرب ياحبنا وقـت الاسفـار=ما همنا إلا الجو وايضا السكينـه
عشنا على الترفيه واسراف وابذار=نعيـش يـوم ويـوم متغافلينـه
سلامكم لعبه كمـا القـط والفـار=القط مثل اللي محاصـر سجينـه
والمشكله في ايدينكم يا بو عمـار=ما تفهمون الدرس ما انته اذهينـه
الدرس واضح لكن اتزيد إلاصرار=وتسـوي الهدنـه تراهـا عفينـه
العهد ينقض والعهد عنـد بـوار=مهما يطول الوقت يرجـع حتينـه
السيده ترقص على انغام واوتـار=وتدلل الخايـن وتعـرف ضمينـه
تعرف ادروب الحق لكـن بنكـار=ذيبه ومسعوووره ونفسٍ ضغينـه
حطت لنا في داخل الـدار مسبـار=والفكر معه إلتف والنفـس شينـه
الدرب واضح ما على دربنا اغبار=شاهد شهد وأشهد على شاهدينـه
هذا كلام اللي قرأ بيـن الأسطـار=تاريخ يبكي ما مضى من سنينـه
بكى بكى حتى فقـد كـل الأنظـار=يمشـي بعكـازه وحالـه مهينـه
قام أيتذكر فعل ماضيـن الأشبـار=والشمس ما غابت على مشرقينـه
قام أيتذكر ضربة السيف لا جـار=والخيل واللي شال رمحه ضمينـه
خلاص وقّف يا قلم خـل الأعـذار=ما تنفـع الأعـذار بعـد الغبينـه

خــلاص وقّــف يــا قـلــم خـــل الأعـــذار=مـــا تـنـفـع الأعـــذار بــعــد الغـبـيـنـه