سلام رديه على اللي قدرها بين الضلوع=عتيبه الهيلا صناديد الرجال الجيّده
هذا سلام الطيب من راسً مايرضى بالخضوع=يجادل السيد لاجل تاخذ مجال السيّده

يامرحبا ترحيبتٍ تكفيك يالشاعر سبوع = عن الرجال الي لهم في الطيبات اعويده
خل السوالف يالرشيدي من طلوعٍ في طلوع = والقاف هذا مانروح اليوم لين نبيده

دام البقا واللي يضيف أهل الوفا مامات جوع=واللي تكلم في كلام الحق كلٍ ييّده
ابشر بعزك وإن بديت المشي لاتطر الرجوع=لين الجمال الحمر تمرح بالقياد مقيدة

يابن رشيد الدله الي سويت تبغى قدوع = وربعك الى منهم خذو دله يبون افويده
البيت لا مني بنيت البيت ماتلقى أصدوع = ابيوتٍ تبقى على ساسٍ جويد امشيده

لاتحسب العالم توحّد بالعوايد والطبوع=الله يخلي للمطيري دلّته وبريّده
حنا نعرفك عبدلي والعالم أحرار وتبوع=وأحرار خلق الله على عبيدها متسيدة