ياعمير بن زبن قلبي جاه مالاعه=ولي قصتن مااقدر أشرحها وصورها
ليا هب ريح النسيم وزان ذعذاعه=مانسيت النفس من ذكرى تذكرها
ماعاد لي فالمحبه قصد وطماعه=ليت المحبه تعذرني وعذرها
ذي نيتي مير قلبي صعبن إقناعه=مايسمع العذل وافكاري محيرها
قلبن يسطر عليه السمع والطاعه=مستسلمن للمحبه مايقاشرها
ياعمير تعرف ضروف الحب واسناعه=معروف في ماضي الدنيا وحاضرها
دايم سيوفه على العشاق بتاعه=ولو هو مرض يفني العالم عن آخرها
يعرف ضروف الهوى من مد به باعه=ويجهل به اللي يدينه عنه قاصرها
سبحت بحر الهوى ماشفت له قاعه=وانا حياتي بغباته مقزرها
ياعمير نفسي من الهجران ملتاعه=والعين عبراتها تحفي محاجرها
أبعد على القلب مصيافه ومرباعه=ومحت رسومن بذيك الدار خابرها
ولا كن سكانها حلوا بها ساعه=معالم الارض مدري وش مغيرها
ليا هب ريح النسيم وزان ذعذاعه=مانسيت النفس من ذكرى تذكرها

ياذياب بن عبود شي(ن)مضالي=وضروف مامرت على واحدن غير
هنيت من قلبه من الحب خالي=ولا يشتكي شكواي لذياب وعمير
حيث إنهم جارن لهم ماجرالي=ومصيبهم ماصابني من عثابير
وكم قبلهم من مكرمين السبالي=وقع بحب المترفات الغنادير
ياذياب قم دوّر ذهيبن غدالي=دوّر ثلاث بكار شقحن مغاتير
واعط البشير بشارته من حلالي=الله يذكر من ذكرهن بالخير
ترا حراويهن جنوب وشمالي=من وجه كشب ليا العقيلات والنير
من دربهن ياذياب تعبت حالي=واكلت علقات التعب والمشاوير
شقحن عليهن الحلق والهلالي=هيم البطون متعبات المداوير
فيهن وصفن من وصوف الغزالي=عنقن من الإدمي وعينن من الطير