سلام ياللي صار لطيب عنوان= يامن مشى بالطيب طول الزماني
يمناة غيثاً وبلها صار هتان= ماتملكة يعطية والعمر فاني
ماهمتة دنياة والوقت لو شان= مثل الجبل في كل حيناً وشاني
رجلاً كريماً والكرم صار له شان= له شهرةً مابين قاصي وداني
صيتة مشى مابين حضرن وبدوان= ونجمة بداء كنة سهيل اليماني
سعود بن عسكر سلايل كحيلان= هو ذخر من طيبة على الناس باني
عودً رباة وعلمة كل ماكان= انشهد انة ورثة بالمكاني
بيت الشعر مفتوح للناس صيوان= كلاً يعرفة ماخفى مودماني
النار مشبوبة غرض كل بردان= لو هبت الشملة لها جو ثاني
في مجلساً مدهال ذربين الايمان= زحول الرجال معربين المجاني
ودلال مصفوفة على النار رسلان= مبهرة بالهيل والزعفراني
برية تبعد خوى كل ضرمان= كيف الرجال بكل وقت وزماني
والعود الازرق حاضر بكل الاحيان= يضفي على المجلس شعور الطماني
الضيف اله ماجوب حيلاً وخرفان= يقلط على الكرمات وسط الصياني
معروف أبو ممدوح من دون تبيان= حرً على صيدة يحب السماني
يفرح ليا قالو مسايير ضيفان= ويفرح بشوفة صاحبة والعواني
وهو رفيق ومقصد لكل الاخوان= الصاحب الي دايماً مرحباني
لبس على راسة من الطيب تيجان= يستاهل البيضاء عريب المجاني
ارتاح ليا جيتة وانا قبل زعلان= كم مرةً جيتة من البعد عاني
حرً ليا جيتة نفض كل الاحزان= حرً ليامنة شمخ صيرماني
هي عادت الاحرار في كل الازمان= دايم سوى والعمر عدة ثواني
هذا وانا قلتة وللقول برهان= ومن لايقيس العلم عدة هداني
اقول شعراً مانبيعة بالاثمان= ولاني بمداحاً كذوب اللساني
صغت المعاني صوغ جوهر ومرجان= واعدها بالكف عشر وثماني
واليا كتمل وزنتها وسط ميزان= واهديتها بالشرط قبل الضماني
لاشعشعت قامت تشكل بالاوان= مثل الجواهر في يدين الغواني
قصيدةً فيها مع الورد ريحان= وفيها مع العنبر زبادً عماني
يقولها مقبل بن بركِي زيدان= الشاعر الي صاغ حلو المعاني
ثلاثين بيتاً قلتها دون نقصان= رفعتها عن كل نقص وطماني
وصلو على المختار من نسل عدنان= محمد الي مسكنة بالجناني