كريم يابرقن سرا تالي الليل= برقه ينوض وحملت المزن في اتلاه
ليا ناض برقه جت ثعوله هماليل = يفرح به اللي مضمياتن رعاياه
جانا من المنشا صدوق المخاييل=عساه يسقي بركة الربع من ماه
بركة ذياب اللي لربعه مداهيل=ابو مثيب اللي كثيره مزاياه
في مجلسه تلقا الشحم زايد الهيل =وسوالفن يشفقلها كل من جاه
يشفقلها منهو يحب التعاليل= من ساير الاجناب ولا دناياه
ابو مثيب اللي في الازمات حلحيل=مامثله الا من يسوي سواياه
له حكمتن يسريبها تايه الليل = وبيتن يكض من المسايير بملاه
قاموس في الحكمه يعرف الدواليل=ويحلم على الجاهل ويغفر خطاياه
ومواقفه تشفي كبود المغاليل=يفرحبها اللي في الشدايد تنصاه
مواقف تتعب فحول الرجاجيل =كم واحدن لوهو بغاها تحداه
له موقفن يرويه جيلن بعد جيل = في جانب المضلوم يوم الله انجاه
وفيه الكرم يجري كما يجري النيل=وبشاشتن تفرحبها في محياه