خبر هز القبيلة كلبوها روق مع برقا = وتداعت له نفود السر واللي ساكناً فيها
وانا بكتب عزاي لمن تذوق لوعة الفرقى = بعد فقد الامير اللي حقوق الناس يوفيها
بعد فقد الامير اللي عليه قلوبنا حرقى = تبكيه الديار اللي رحل عنها مخليها
بكى ضلع الينوفي مع سجا والعبلة الزرقاء= وبكت كل السروك ونجد هلت له عباريها
وتبكيه القبيلة كلها في الغرب والشرقا = ولابه عين تعرف سيرته ماهوب يبكيها
كثير اللي رحل مير المواقف بينها فرقى = ابوغازي قلوب الناس من فرقاه يدميها
ابوغازي عليه عيوننا من دمعها غرقى = واثر دمع العيون ليا انتثر بالحيل يحفيها
وانا والله لابكي ياعلي واجاوب الورقاء = بعد تركه فراغات علينا كيف نمليها
والا ياموت مااسرع تسرقه من بيننا سرقا = عيون اللي يحبونه علامك ماتراعيها
كم انقذ من رجال في المصايب والدهر غرقا = ذرى كل القبيلة بعد غادر من يذريها
وعزانا في عيالاً بعد ابوهم للعلا ترقى = تعلوا في رجوماً كان ساكن في علاويها
عسى الله يرحمه في موقفاً يوم امته شرقى = ويسكن في جنان الخلد ياكل من ثماريها.