الهيـــــــــــــلا *** منتدى قبيلة عتيبة

للخيل خياله وللشعر شعار
اقولها في مدح ربعي عتيبه
لطامة العايل هل العز والكار
ذباحة الحايل ولاهي غريبه
لنا الكرم والطيب عنوان وشعار
وسيوفنا فوق المعادي عطيبه
يوم المعارك جالها عج وغبار
ربعي عتيبه مارضت بالغليبه
حنا سوات السيف والسيف بتار
والسيف له عند المخاليق هيبه
انشد عن العتبان في كل الاقطار
تلقى العتيبي عز من ينتخيبه
واليوم في جزل المعاني ابختار
واشرف على المرقاب واعوي لذيبه
سود الليالي مبهمه والفلك دار
دار الفلك ياخوي دوره عجيبه
ماني من اللي يسبر يمين ويسار
وليا لقا الفرصه تناوش صحيبه
انا سعد ابن قثام نسل الاحرار
احل عسرات الامور الصعيبه
قلته وانا في خاطري بعض الافكار
اعدها من دون شك وريبه
بعض العرب مشغول في نقل الاخبار
احد(ن) يودي علم واحد يجيبه
احد(ن) يودي علم لو كان ماصار
واحد يصدقله ويفتل شنيبه
وبعض العرب في خوته يجلب العار
يعيب العربان ماشاف عيبه
ياللي تحزم بندقك مالها عيار
وليا رميت ابه الهدف ماتصيبه
ماقدمك الاالجمر مع صالي النار
واللي يدوس الجمر يونس لهيبه
يحماني الله من صواديف الاقدار
الواحد اللي كلنا نحتميبه
وختامها صلوا عدد وبل الامطار
على رسول(ن) كلنا نقتديبه

الشاعر / سعد القثامي