سلام رديه تعم اللي لهم رأي وشور= واللي بليا راي والا شور ابا اقصرها عنه
اسمع مع البدوان يقلو ن الصقور من النقور=واللي فهيم(ن) بالمثل يجي ويشرح لي هنه

يامرحبا عن ربعي اللي مابهم رجل معثور = وقت ٍ به اهل الميسره صار وا هم اهل الميمنه
عندي مثل ثاني لكم ياللي جهلتو فالصقور = الصقر من لايعرفه يشويه حاجه ممكنه

دام البقا عن ربعي العتبان والبيت معمور= واللي على درب الهدى جنب دروب الشيطنه
اللي يعرف الوارده حاشا مايجهل فالصدور=واللي يغني طرق لابده يغني بلحنه

بالربع صدري ضاق وآنا من وسيعين الصدور = ياخوف بعض الناس يعديني بعله مزمنه
ياسرع مابين لنا المكتوب مابين السطور = والرجل تطلع فالمواقف وش حقيقة معدنه

ان كان صدرك ضاق هلل واطلب الرب الغفور= اثر ابليس الله يامنا ياجماعه يشحنه
يالحمة المغلوث عيت لاتفيح ابها القدور= لو ان اكل جيعان منها ياعرب ماتسمنه

ماضاق صدري غير من قولك ولاجاني نفور = ياشاعر ٍ ماعنده الا الوزن يقدر يحسنه
ربعك بعد مارحت يابحر ٍ من كبار البحور = صاروا كما وصف العجايز ماش غير الونونه