إليا بدعت القاف قافي ما يشيب=وآجيب من زين البيوت إجزالها
وان كان ما تمسي سوات العندليب=يا اصحابنا فال الله ولا فالها
الليل كله يا منادي يا مجيب=واللي معه لو نص كلمه... قالها
ما ادري متى يخلص طليب(ن) من طليب=حتى تحاسب كل نفس اعمالها
وشلون راع الطيب ما يجزى بطيب=وتقابل الحسنه بعشر امثالها
الليل يا معروف يا العظم الصليب=يا اللي ليا اركى للحمول اشتالها
من لابة(ن) يوم الوغى سقم الحريب=واهل الشيم واهل القيم بحلالها
يا ذيب يا اللي للعوا جاوبك ذيب=ما خذت يمناها وحزت شمالها
ولاني وانا صالح بعبّاد الصليب=ولا محتري ليله يهل هلالها
بعض العرب لا جيت والمآقف صعيب=لا عم للدعوه ولاهو خالها
إليا دعيته للوفا ما يستجيب=تعباله الدنيا وهو يعبالها
وبعض العرب فالوقت مقطوع النصيب=لا يقدم الحمله ولا يبرالها
إليا حظرو حاظر ولن غابو يغيب=مثل المره دايم ورى رجالها
يا ربي ان الضن كله ما يخيب=والناس يا الله لا قطعت آمالها
هذا ولو به ما ذريتك يا ركيب=حتى تجي شجره يضل اضلالها
جرح(ن) يطيب وجرح يبطي ما يطيب=وآخير من حل المدن ترحالها
وعيار يدوش خير من واحد يصيب=ان صاب جاب خفافها وثقالها
وان كان ما ذيب الخلا يقنب قنيب=يرتاح عند ام الوشم وعيالها