قالو عليل وقلت لا لا تقولون=مابي بلا ياأهل القلوب الغشيشه
يااهل النوايا الخاطيه لوتكفون=عما يحز بخاطري وتخديشه
لاتنشدون ان كان ياناس تدرون=لاتبحثون اللي تزعزع عريشه
قلب وطته حزون وهموم وغبون=واصبح عليه الهم باني عشيشه
من حب غرو صوب القلب بطعون=صواب جول نتف الملح ريشه
سهمه تمثنى القلب يااللي تعذلون=في وسط قلب فاتحله دريشه
صواب منهو شال حتفه ضحى الكون=من كف مقعد محتمي تال جيشه
لاجاء نهار فيه صاحيه مجنون=بيوم مثل يوم جبله والهييشه
وانا صوابي مكنه صافي اللون=من غيبته داري واهلها وحيشه
وانا في شوف مغيزل العين مفتون=هو سلوتي هو مشربي والمعيشه
كله بهى يوسف وانا كلي عيون=من حاش مثله رابح بتحويشه
والحب قبلي للمحبين مسنون=كم شيخ قوم في زمانه يعيشه
وفريس عن مركاضهم مايصدون=وشعار نجد اللي خذاهم بطيشه
امثال عبدالله وغازي ذوي عون=والباهلي والاكلبي راع بيشه
ومحيسن الهزان هو وابن لعبون=وابن الدجيما صوبه وابوخيشه
على النقا والعرض محمي ومصيون=قبل يجي للحب خبله وديشه
ماهوب حب النت ولا التيلفون=اللي مهابيل الخلايق تعيشه

صح لسان الشاعر فدغوش بن محسن

ومشكور أنا الود ونتمنى قصائده الباقيه ...