ماكل الايام مزح وضحك يامنيف = لابد يوماً يبيح كل خافي
يوماً حريصاً على فرقا المواليف = يبين فيه المصافا والتجافي
تضيع فيه الحلايا والتواصيف = وتشوف فوجيه الاصحاب اختلافي
جفنناً دموعه على خده ذواريف = وليا قضى الدمع هل الدم صافي
وجفنناً يقول انتهت كل التحاسيف = ماللحزن في محاجيره ملافي
تلومني يوم انا من وقتي معيف = وتقول وش في مقابيلك مقافي
بلاي هماً تمركز فالسراجيف = معقباً فتق مايرفاه رافي
عيني تشوفه وهو للناس ماشيف = صار السبب فانعزالي وانصرافي
ليا انفرد بي يوردني على الحيف = على حدود الصقيلات الرهافي
اسكر السمع عن بعض السواليف = واقول غافي وانا مانيب غافي
وا لفت من سطوته روس المشاريف = فراش والقبه الزرقا لحافي
وجبرني آخذ من الذيب المهاريف = اعوي بالالحان واقنب بالقوافي
انا على ادناة ميله قلبي اصخيف = اخلقت وافي وقلبي خلق وافي
لوّ ان الاقدار تعطيني على الكيف = ما رضا على اعدى معاديني خلافي
يامنيف ما دام للشاعر تصانيف = هذي تصانيف فكري يالسنافي
وانته على مثلك تجوز العجاريف = وبدون شرح العلوم الرمز كافي