مراسله بين الشاعرين :::::: بنيدر بن مدوخ الغنامي والشاعر فراج الغنامي

جاب رداد الخبر علمٍ مفاجي=وفز قلبي بين فرحه وانزعاجه
بركن عوص النجايب يامناجي=وكل طماعٍ نوا مس الحداجه
يحسبنه مثل سعدون العواجي=مارفع عطب الضرايب لين عاجه
قرب اللي ماشروه من الحراجي=والهواء ماقد أكل وجهه عجاجه
معتدل ماعدله راع الكراجي=هيكله ومحركه شد الخواجه
والبليتين أكتروني والبواجي=والكفر موزون مسحه وارتجاجه
كنه القرناس مع جرد الفجاجي=ناحرٍ للملكة قضاي حاجه
بالنيابه سايقه طلق الحجاجي=نطحه فراج باركله زواجه
خابره في مامضى نومه سهاجي=ياقمر نص الشهر عدل مزاجه

راكب اللي ماشروه أهل الكماجي=وأن نصا دارٍ من التيسير باجه
شركته حطت على الكبوت تاجي=وأفتخر راعيه في قطع الزراجه
ياعلاج الضيق من بد العلاجي=ياهواء اللي مايعيش مع اللجاجه
سارحٍ بدري من العد الهماجي=والكويت أقصى مراسيه ومداجه
عند ابو سلطان ذباح النعاجي=يوم بعض الناس مايذبح دجاجه
وصله مني سلامي وأحتجاجي=وقل طلع فراج في خط المواجه
طمعه عياد يدخل فالملاجي=كل ماجاله بعاجي كب عاجه
يحسبنه مثل أخو سعداء العواجي=خاض جيش الغرب لين أكثر خلاجه
والسلام ولا عن الحاصل مماجي=ومن طمع فالسيف ماعاف اتعاجه