المبتدأ باللـي خلـق للبحـر شـط=اللي دحى أرضه ورسّابهـا الطـور
وصلاةٍ أزكى مـن عطيـط المخلّـط=على الشفيع اللي غدى للبشـر نـور
ومن بعدها يامحمـد الجـذل سفّـط=البهبهانـي ودّنـا نقطـع الـبـور
إنت الكريم اللي علـى الطايلـه نـط=وإنت السلاح اللي ذعر كل مذعـور
وإنت الرفيق اللي على الدرب ماغـط=من فوق جمـسٍ للمهمـات مخبـور
على صحاصيح الخـلا ذيـبٍ امعـط=توايره تُودع صفى القـاع مشطـور
يرقابنـا روس المشاريـف وهْبـط=ويشوحنا من دون عرعر وابا القور
مكينتـه ماينتـثـر زيتـهـا قــط=ولاتحتمـي لوقامـت سيـوره ادّور
له هيبـةٍ لاجـا التفاتيـش وشْـرط=واليـا وقـف كـلٍ تحـلاّه مبهـور
لجّـة مواصيـره هديـر المـربّـط=مابيـن ذيـدان المباكيـر مهجـور
وقدحت شكامينـه كباريـت تشْخـط=والاّ شهابٍ في دجى الليل مسجـور
الجيـب لوسـوّى سوايـاه خـبّـط=حتى السفاري من مزايـاه مقهـور
أسطوري الهيكـل خرافـي مجنّـط=تقول فلـمٍ مخرجـه نجـدة أنـزور
أنا اشهـد إنّـه للمهمـات والخـط=مشكور يامن صمم الجمس مشكـور
ويالشمري ادعس على البنص وشْحط=وعنّز على الأردن معَ فجّـة النـور
نبي على المبـروك نكفـخ ونمْغَـط=حرّوة مغيـرٍ للسراحيـن مشهـور
هل البويضاء لحْتمى الوقت وشْتـط=ترسي كما يرسي على الموج بابـور
كم فارسٍ من هول رمحـه تفرشـط=وعوّد على ربعـه كسيـرٍ ومدحـور
على العدا أقسى من السيف وسْلـط=وإلاّ موالينـه بساتـيـن وزهــور
تكْرم جناب الضيف بالطيـب وتْحـط=مع الشبب كيـف المباهيـر وبْخـور
ستر اللي بعويد الشمطـري تمشّـط=ريف الدخيل اللي زبن حرْوة الـدور
يقولـه اللـي زاج طرسـه تمغنـط=كن اليراع ابخنصره بـات مسحـور
النايـف اللـي بالمهمـات يقـلـط=شاعر هوازن لا حضر مثّـل الـدور
وخْتامهـا يافـارقٍ بحـره ابـشـط=تخْتم مساعي حفلنـا بذنـب مغفـور