اليكم اخر روائع الشاعر مصلح ابن عياد الحارثى

يالله يلى تستـر الطيـر بالريـش=يلى على فضلك تعيش المواشـي
يارب عبدن في ضميره نواهيـش=تلعب بقلبي لعب صـف النواشـي
انا ليا منـي نويـت المطاريـش=يخف نومـي ويتضايـق فراشـي
كنه يدق صبـي عينـي مناقيـش=النور طافي واحسب النور واشـي
وليا طرالي راعي الكبر والطيـش=كنه خشيرن لي معي في معاشـي
يانافخن صدرك تكبر على ويـش=والله وماقالت ترا ء اللاش لاشـي
الكبر منهاج الخبـول الدراويـش=مكبريـن ظهورهـم بالخيـاشـي
يالله لاتجعل طريقي على الهيـش=هرع الكلام المستحيـل الهتاشـي
رجال في طردن وراء لقمة العيش=وفي غيرها لد النظر وانت ماشـي
والثاني اللي مركزن للحشاحيـش=تلقى مساييـره هجـاد وغباشـي
عنده مداويـر الرذيلـه مهاييـش=عودن على ضوه يحوم الفراشـي
قليل دين وعقله اصخف من الريش=وجهه صفاه وبشرته جلد حاشـي
عساه فـدوه للعيـال المداغيـش=الطيبيـن الصامليـن الهشاشـي
الصادقين الصامليـن الهشاهيـش=زبن الدخيل مصدريـن العطاشـي
الله من قلبـن ينوشـه مناويـش=توميبه اومايت غصون الهواشـي
لاوالله الا صار فى الجو تشويـش=يباع فيه الـدم الاشقـر بلاشـي
يابايع الدم الحمر بالغلـط ليـش=اهدرت دمك بين مرشـى وراشـي
مدرى ظلام وفرصـة للخفافيـش=والا سراج ونور والقـدر طاشـي
السالفه ماهى هجـاد ومغابيـش=يبغالها مجلـس رجـال ونقاشـي
اما زعلنا من زعل قائـد الجيـش=والا قدحنا النار والعـود واشـي
مظاهرات الغرب حمر الطرابيـش=ماهى لنا ياهل السفـر والتماشـي
هدم البناء عيب وغلط ياشواكيش=ماعاد نبغى من مطركم رشاشـي

المشاركة الأصلية كتبت بواسطة عبدالرحمن الهيلوم (المشاركة 880394) صح السااااااااااااااانك والساااااااااااااانه يالذيب

المشاركة الأصلية كتبت بواسطة ابن صنهوت (المشاركة 880571) ابو نواف بيض الله وجهك اشهد بالله انك تنقيت وصح السان ابو فهد سبقتني وانا كنت بنزلها يابن العم لاهنت يالذيب

المشاركة الأصلية كتبت بواسطة محمد العتيبي (المشاركة 880638) الله الله الله صح لساااان الشاعر العلم / مصلح بن عياد دائما جزل ما شاء الله عليه .. لاهنت يابونواف علا الاختيار الفاخر