رفيقي-يوم مثلك للرفاقه وافيً نصاح=ومثلك بالشعر لاشك تعجبني هناديبه
بعد ما أبطيت عن قرض الشعر والخط بالألواح=وردني بالمساء هجسً عجولً عاويً ذيبه
صدف ضيقة حشا دايم تخاويني على المرواح=إلى منه برد (قرص السماء) وأقفت لواهيبه
بعدما شد-كف العاصمه عني (هلال رماح)=وحسيت بلظى الفرقا تود الفكر وتجيبه
(هزعت) عن الطريق ومقصدي ماهو عشان أرتاح=بلايه هاجسن فيني يسد الدرب ويعيبه!
تخيلت الطريق أفعى ولوحات الديار أشباح=تقول إرجع ورى خل الخفوق يزين تأديبه
تركت الطريق وهمت عنه مع الخلا سواح=أبي جو الفكر يصفي وتصفى له مشاريبه
وأنا اللي لاأحتمى فكري وصدري من همومه فاح=أتل الرجل لأطول رجم وأبدي في مراقيبه
وأريض فالرجم ساعة زمن وأصافح الأرياح=بها قلب العنا ينسى النشب والريح تومي به
وأجر الصوت بألحانً تطاير في فضاء المسباح=يضيق بها الصدر وتثور من مكسب ومن خيبه
حكيم الفكر طيرً حر وحدود الخيال جناح=وزينات المعاني صيد لأوطاها مخاليبه
وإلا منه صفى بالي وكل اللي غشاني راح=ألملم مابقى مني -وأخيط للأمل جيبه
وأصندق همن بصدري وأسلم للرجم مفتاح=وصندوق الهموم-الريح تعرف وين تغدي به؟
نصاك الشعر من شاعر عزاه إنه لسمعك باح=غرابيل الدهر صِبت قوالب في مكاتيبه
ورايك ياوسيع العرف نور ومشعلً وضاح=وأنا أحب الرجال اللي تشوف الرأي وتصيبه
أعرفك للجروح دواء وغيرك للقلوب جراح=وغيرك ما أستمد أرياه لو تكثر تجاريبه
ثمان سنين ما أعرف الفراق ولا الحمام إن ناح=وأخذت من المثل حكمه تقول الرزق تغريبه
وأما اليوم لاتنشد عن أخبار الفتى ياصاح =لعب فيه الفراق وتضحك الدنيا بألعايبه!
غرقت اليوم في بحره وأنا البحري وأنا السباح=أعرفه لكن اجهل فيه تبديله لأساليبه!
كرهت إسم الوداع ودلة القهوه على المسراح=على خطً سريعً نوب نسرح به ونمسي به
وأعرف إن مابها الدنيا من هموم الزمن مرتاح=ووقتي لو صاف ساعه يعود ويفرك جنيبه!

المشاركة الأصلية كتبت بواسطة عمر العتيبي (المشاركة 876519) الله الله عليك يا السمي قصيده شامخه صح لسانك ملايين ومن طول الغيبات جاب الغنايم واشهد انك جبتها يالذيب

المشاركة الأصلية كتبت بواسطة سلطان بن دحيم (المشاركة 876533) اشهد بالله انها قصيده رائعه صح لساااااااااااااانك تحياتي

المشاركة الأصلية كتبت بواسطة سيف عنزه (المشاركة 876554) صح لساااااانك ماقصرت

المشاركة الأصلية كتبت بواسطة عبدالله الاصعر (المشاركة 876762) صح لسانك ياعمر الروقي على هذه القصيده جزله من جزل تحياتي