على ذكر الغرام وطاري الأطلال والاحباب=تقدم يا قدم رجلي وخذني يم خلاني
وعلى أبواب المدينه عقب ما نطلع مع آخر باب=تسمع في لحوني يوم أغني ويش سرّاني
ومثلك يعرف الاسباب ما تدري وش الاسباب=ظلام الليل يسريبه بعيد الدار عجلاني
نفود وبرد وجبال ومسافات وْقنيب ذياب=فجوج البَيْن مع {خَوْر الذياب} الشهب تَحْداني
أهيم بوحشة الليل البهيم ومغرم ومنصاب=وانا اللي كثرت طعونه ولا يدري من الجاني
تَهَاوي يالنجوم الساريه في ديرة الاجناب=وهلّي يالمزون البارقه بديار جدّاني
سلام الله يالوادي سلام الله يالمرقاب=سلام الله يادارٍ مشى فيها عضياني
سلام مْوَادع الغربه ودمع معانق الشّيّاب=تذعذع به هبوب النّود عُود أزرق وريحاني
تسيّر به على أهل السيف تاخذ به ثلاث وجاب=وتَذْكرني مع القاصي وتَذْكرني مع الداني
أنا اللي ما اتغير لو تغير بالزمان هضاب=زماني مايغيرني واهل عمهوج عمّاني
وأنا لولا فراق ٍهدّ حالي بَعْد طول غْياب=وكلّه سبّة اللي يوم ناديته ولا اوحاني
تمشّي يا بعد روحي فلا كلّ التراب تراب=ترى نجد العذيّه رملها لولو ومرجاني
يظللها ظلال العزّ ما ينعق عليها غراب=ظلالٍ مع ظلال رموشك وذا موتي الثاني
ينوّر ليلها خدّك ولو غاب القمر ما غاب=يشع النور من نورك على العالم وينساني
صحيبك هو صحيبك ماتغير طبعه ولا تاب=عذابه خصرك الناحل كفى يابنت ما جاني

المشاركة الأصلية كتبت بواسطة سلطان بن دحيم (المشاركة 856421) صح لسانك والله اني صادق

المشاركة الأصلية كتبت بواسطة محمد غازي النخيش (المشاركة 856425) الله الله ابداع يالمتيهي صح لسانك مليون

المشاركة الأصلية كتبت بواسطة فواز علي سريع الروقي (المشاركة 856466) اهلا وسهلا بك وتسلم يمناك لاعدمناك ابداع والابداع فالك وليس بغريب عليك دايما نتشوق لجديدك المفيد صح لساااااااااااانك ولاهنت على ماقلت قصيده اعجبتني ولاعليها غبار ولافي ذلك شك لانها تدل على ان وراءها شاعر كبير ومبدع فإلى الأمام اخي الغالي تقبل تحياتي الشاعر : فواز علي الروقي

المشاركة الأصلية كتبت بواسطة آبـوحربه (المشاركة 856902) صـح لسانـك يـابـو بـدر شاعـر جزل ومبدع لاتحرمنا من جـديدكـ ومن قـديمكـ