تباهي ياهواجيس القصيد وخلي الاحزان=تباهي وأتركي كل العقول اليوم مذهوله
تباهي وألبسي عقدن ملاه اللول والمرجان=مادام ان الفرح في وسط صدري تركض خيوله
أنا الليله مثل من تاه فالصحراء وهو عطشان=وشاف الهجره الي نارها للجود مشعوله
شعوري غير وإحساسي يفوق الوصف والقيفان=قسم بالله لو بأوصف شعوري ماني بحوله
يقولون العياد اثنين لازود(ن) ولانقصان=وانا أقول الزياده في عددها اليوم معقوله
إذا الاعياد بالفرحه تقاس ولاني بغلطان=أنا اقول أربعه والناس غيري كلن يقوله
ومن يبغاني أبرهن كلامي مستعد ألان=اعددها عليه الأربعه والنفس مسئوله
الأول عيد من صام رمضان ويطلب الغفران=لعل ذنوبنا لاحل بالغفران مشيوله
والآخر عيد من ضحى وكفه بالكرم مليان=ولاهمه بخيل(ن) كفه من البخل مشلوله
وثالثها سلامة سيدي راع الكرم سلطان=عسى من لايحسبه عيد بات بنفس معلوله
لاوالله عيد واكثر من فرح بحلوله اليتمان=ضعوف(ن) من ولي العهد محفوله ومكفوله
غشتهم فرحة الدنيا بعد مابين الديوان=علوم(ن) عن سليل المجد حصريه ومنقوله
غشتهم واغتشتنا وأسرفت في داخل الوجدان=طغت وسطه وحزن الوقت روح يسحب ذيوله
تعايدنا من الفرحه من اقصى الجوف لانجران=ومن شاطي بحر جده ليا الدمام وحقوله
تعايدنا ومدينا كفوف الشكر للرحمن=ومحانينا بعد ضاقت من الافراح منزوله
هذا هو عيدنا الثالث وباقي للفرح عنوان=مادام إن العناوين أربعه فالصدر محموله
ومن ينشد عن الرابع بعد ربي كتبه وبان=اجاوب له لو إن العيد كلن لاحظ حلوله
ترى الرابع قرارن صارد(ن) من هيئة الاخوان=تفاصيله معالمها سيوف الجود مسلوله
تباشرنا وبشرنا بعضنا والمطر هتان=بعد عين وزير الأمن نايب ثاني الدوله
حفظك الله يانايف لنا يامعرب الجدان=حفظك الله ياأميرن تقول العلم وتطوله
حفظك الله ياألي ماقفك تشهدله العربان=حفظك الله ياثالث دروع الدار وزحوله
فرحنا بك فرح حاتم ليا من جوله الضيفان=وغنينا من الفرحه على القيتار وطبوله
فرحنا بك وحنا لك سند يافارس الفرسان=على الأرواح تامر ياشجيع(ن) تبهر فعوله
فداك الروح يابن مسطرين المجد فالميدان=سلاطين(ن) شواربها على الطالات مفتوله
وفداك الشعر لو الشعر في وصفك جلس عجزان=لكن الله يجملنا ندل الحق ونقوله
تباهي ياهواجيسي وميلي ياغصون البان=مادام إن العياد الاربعه للناس مقبوله
وش أصدق من ثنين(ن) جات فالسنه وفالقران=مشاعرها من الأفراح ممتليه ومبهوله
ووش احسن من سلامة سيدي راع الكرم سلطان=وتعيين الامير الشهم نايب ثاني الدوله

المشاركة الأصلية كتبت بواسطة ولد المزاحمة (المشاركة 846644) وش أصدق من ثنين(ن) جات فالسنه وفالقـران مشاعرهـا مـن الأفـراح ممتليـه ومبهـولـه ووش احسن من سلامة سيدي راع الكرم سلطان وتعييـن الاميـر الشهـم نايـب ثانـي الدولـه بيض الله وجهك على القصيدة الرائعة والحمد لله على سلامة والد الجميع واشكرك على الابداعات وانت دائما مبدع

المشاركة الأصلية كتبت بواسطة سلطان بن دحيم (المشاركة 846675) صح لسانك مليون