العازمي

مافيه يامعجب صفوف وكيمرات ومكرفون = الا مباكير البيوت اللي كما نقش الحجر!!
ياللي تحط اللوم سد اللوم قلّي من تكون!= وانته قبل كم يوم جايٍ باللغم وسط الكمر !!

معجب العتيبي

لاصرت انا واياك مانحتاج ناسٍ يسمعون=السالفه حرفين مكتوبه وتقرا بالنظر !!
لاتتهم صاحبك قدام العواذل يفرحون=لاتتهمني وانت غايب مالقيتك من شهر !!

العازمي

لابالله الاخلهم يوحون والغيّب يجون = وابشر بمن يظهر حفيلك من هنا ! لين الفجر!!
ناديت بالمبدأ ومن طيبك على ربعك تمون = لكن قابلت الثقه باقسى عبارات الغدر!!

معجب العتيبي

ماهوب من صالحك لكن خل ربعك يرقدون=تبا تعني نفسك وربعك ويتعبك السهر !!
انا على المبدا وراع العرف لايمكن يخون=لاتجمع البارود حول النار ويزيد الخطر !!

العازمي

نعطيك كاش ورحت يامعجب تجمعها ديون = غلطتك من بيت الغنا ,حطّتك في بيت الفقر!!
نادر تحصّل في عتيبه شخص للهزله زبون= وايضاً ضيوف عتيبه الهيلا قويين السّطر!!

معجب العتيبي

ماودي ان العازمي يسري مع الهم مغبون=والعازمي يكفيه لاغنيت بالمعنى شطر !!
ماجبت شيٍ يعتبر مجهول ياراع اللحون=لكن نبا نمنحك فرصه هاتها باخر سطر !!

العازمي

حنا نباك تخاوي الهقوات وانته صرت دون = حبل المعاني لو نمده عن هدفنا ماقصر!!
شعر الحداثه شئ رائع عكس ماتتخيلون = حطّو رصيف الشمس يامعجب على وجه القمر!!

معجب العتيبي

في تالي الايام بعض الناس لو ماينشدون=يرسل شهادة زور والا جور من زود البطر !!
لو يعجبك يالعازمي مايعجب اللي يفهمون=لاتتبعه خلك على نهج الرجال المعتبر !!

العازمي

الفرق مابين العقول وبين نظرات العيون = واللي ليا حدّث كذب واللي لياخاصم فجر!!
الامر لله يالعطاوي بين كاف وبين نون = لكن في فن التطوّر خذْلك دروس وعبر!!

معجب العتيبي

الفرق بين وبين وانتم يالعوازم تعلمون=واللي تقولونه من الاصحاب عمره مابدر !!
ياجعلكم ياصحابنا ياهل المعرفه تسلمون=ويزيّن الله فالكم ياصحابنا طول الدهر !!