أمس الضحى في عالي الرجم عدّيـت=في مرقـب ٍ يبحـث كنيـن المـودّي
رجـم ٍ ليـا منّـك براسـه تعلّيـت=يبحـث خفايـا المتقّـي للمـعـدّي
وقضيت في راسه من الوقت ماأقضيت=أوّل نهـاري بيـن جـزر ٍ ومــدّي
ونادى علي وقال جـا مـن تحرّيـت=ازهم عسـى اللـي تحتريلـه يـردّي
وألاّ إنزل الله لايعوقـك ليـا أقفيـت=مـن كثـر ماونّيـت بيّحـت سـدّي
ناديت في راسي على الحي والميـت=عدّيـت فـي وجـاك همّـك معـدّي
قلت انت نقّضت الجـروح وتخلّيـت=أباك عـون ٍ لـي وعـوّدت ضـدي
يارجم أنا من يـوم فيـك اشرهبيـت=شفت الخلي من حيث عينـي تلـدي
ذكرت جيـل ٍ فـي كنفهـم تربيـت=وحـب ّ ٍ بقلبـي عامـر ٍ مايهـدي
قال انزل انت اللي على نفسك أخطيت=الرجـم خـط الذكريـات الـمـودّي
وحوّلت من راسه جـداي التناهيـت=مثل الخلوج وعبرتـي فـوق خـدّي
مبدا ً يجـرّع راعـي الـود حلتيـت=أسقانـي السـم الذحـاح المصـدّي

من مرقب ٍ يفتش تقى الارض تفتيش=تبيـن مـن عالـي حجـاه المتاقـي
مبدا ً لخال القلـب بـردا ً نشانيـش=وأنـا رقيـت وجانـي الهـم راقـي
أمّـا تولّـم يانديـبـي مغابـيـش=والاّ أسر مع مسرى مخيف الطراقـي
ليا طار شبل الناس مع لقمة العيـش=وجا بينهم حبـل التواصـل دقاقـي
يلزمك منّـي بالوصـاه المطاريـش=لرفيقي اللـي مـن خيـار الرفاقـي
رشيـد زيـزوم العيـال المداغيـش=ليـا لاذ بالجنـب المتيـن الرقاقـي
وسلّم وقل يالقرم صاحبك في ويـش=رفيقك اللي في حجا الرجـم أواقـي

غاد ٍ كما الفـرّاع بيـن الهواويـش=يغيـر بيـن الملتـقـي والمـلاقـي
مما تشوف العين فالفكـر تشويـش=ضايق وجـات الذكريـات الغلاقـي
حنّيت للماضـي حنيـن المعاطيـش=وسقت النظر مع مجرهـد الرقاقـي
جرد ٍ تزيد موحّش القلـب توحيـش=عقب النزول اللـي عليهـا اشتياقـي
مجالـس ٍ للنجـر فيهـا غطاريـش=ولاهي لمن يشتـم و يمـدح نفاقـي
أسلافنا يـوم المعـاوش عراميـش=جيـل ٍ رحـل قـدم الامانـه تباقـي
قوم ٍ لفزعة مـن نخاهـم مداهيـش=وملجا ً لمن ضيّـق عليـه الخناقـي
يا ذخر ملحقة المتلّي مـن الجيـش=ليا جالهن عند الطريـح اصطفاقـي
شفت الرسوم وهل دمعي جواهيـش=ومفتـاح غربـال المـود الفـراقـي
للنفـس شـف وللمنايـا مهاتيـش=نبـا وتطوينـا الليـالـي سبـاقـي
والعبد يجريله من الدهـر تمحيـش=وإن مر به عسر ٍ بعد يسـر ضاقـي
وماقل دل وكثـرة الهـرج تدويـش=موجـز وبـاق ٍ للسوالـف بواقـي
وأسلم وسلّم عـد وبـل الرواعيـش=عد الرشاش مـن الخيـال الحقاقـي
وصلّو على اللي همّش الشرك تهميش=شفيـع تبّاعـه بـيـوم التـلاقـي